Рекордни 45 поени за Стеф Кари оваа сезона

Предводени од Стеф Кари и неговите рекордни сезонава 45 поени, акуелните НБА шампиони, кошаркарите на Голден Стејт забележаа победа на гостувањето кај ЛА Клиперс со 121-105 во дербито на вечерта.
Вицепрвакот Кливленд славеше победа против Орландо од 127-131. Решавачка беше третата четвртина која „Кавси“ ја добија со 40-23. На Леброн Џејмс му недостасуваше една асистенција да оствари „трипл-дабил“, па средбата ја заврши со 33 поени, 10 скока и девет асистенции.

Најнеизвесниот натпревар го одиграа Бостон и Бруклин во кој „Селтикси“ остварија победа со 87-85, благодарение на најрасположениот свој играч Кајри Ирвинг кој постигна 21 поен.

Неочекуван пораз претрпе второпласираниот тим на Западот, Хјустон, кој загуби на гости кај Детроит со 108-101.

На останатите натпревари беа постигнати овие резултати: Индијана - Чикаго 125:86, Орландо - Кливленд 127:131, Вашингтон - Милвоки 103:110, Минесота - Њу Орлеанс 116:98 и Сакраменто - Денвер 106:98. /МИА

СП 2018: Шаќири: Мојата радост беше полна со емоции

Швајцарскиот фудбалер Ѓердан Шаќири изјави дека не сака да ги коментира реакциите на радоста на неговиот победнички гол против Србија.

Швајцарската репрезентација ја совлада Србија со 2:1 во натпревар од групата Е на Светското првенство во Русија, а стрелец на решавачкиот гол беше Шаќири во 90-та минута.

Швајцарскиот фудбалер со косовско потекло на голот и на победата се радуваше гестикулирајќи орел како симбол на албанското знаме, а многумина особено од српската страна го сфаќaат како политичка провокација.

- Не сакам да го коментирам тоа. Ја видовте мојата радост беше полна со емоции. Оваа победа е за Швајцарија и тоа е се што би рекол за темата, истакна Шаќири.

На сличен начин и неговиот соиграч Гранит Џака, кој исто така има албанско потекло, се радуваше на првиот гол кој го постигна за израмнување на Швајцарија. /МИА

СП 2018: Митровиќ: Многу наивно ги примивме головите

Српскиот фудбалер Александар Митровиќ по натпреварот со Швајцарија изјави дека многу наивно доволиле да примат два гола.

Швајцарската репрезентација ја совлада Србија со 2:1 во натпревар од групата Е на Светското првенство во Русија, а Митровиќ во петтата минута го постига единствениот гол за српската репрезентација.

- Не знам што се случи, ги примивме головите многу наивно и многу глупаво. Наместо да го браниме резултатот...Не може да се оди како мува без глава, разочаран сум, истакна Митровиќ.

За Србија сега единствена шанса за пласман во осминафиналето е победа против Бразил.

- Треба да се бориме против Бразил и да играме за победа. И Костарика и Швајцарија покажаа дека може да се игра против нив, наведе српскиот фудбалер.

Во оваа група Бразил и Швајцарија сега имаат по четири бода, Србија има три, додека Костарика остана без бодови и без шанси за натамошен пласман. /МИА

СП 2018: Швајцарија ја совлада Србија

Швајцарија ја совлада Србија со 2:1 во натпревар од групата Е на Светското првенство во Русија.

Во возбудливиот натпревар со сериозни шанси на двете страни, српската репрезентација дојде до водство од 0:1 со голот на Александар Митровиќ во петта минута, резултат со кој се замина на паузата.

Во почетокот на вториот дел Гранит Џака беше прецизен и Швајцарија во 52-та минута израмни на 1:1.

Швајцарската репрезентација со голот на Џердан Шакири во 90-та минута дојде до победа од 2:1.

Во оваа група Бразил и Швајцарија сега имаат по четири бода, Србија има три, додека Костарика остана без бодови и без шанси за натамошен пласман./МИА

притисни ентер