Каевски: Спортот да го оставиме на спортистите, не на политиката

Новиот директор на Агенцијата за млади и спорт, Дарко Каевски не ја исклучува можноста во блиска иднина дел од оваа институција да стане и некое звучно спортско име.

- Сигурно е дека ќе се вклучат луѓе кои имаат влијание во спортот. Целта е јасна – спортот да го издигнеме на едно повисоко ниво. Спортот треба да биде оставен на спортистите, не на политиката, изјави Каевски .

Тој сака да помогне за поголема инволвираност на младите лица во општеството, но и да ја продлабочи соработката со спортските федерации.
- Агенцијата за млади и спорт досега главната перцепција ја имаше врз спортот, но новото раководство со мене како директор ќе се залага за младите да добијат значително место во општеството. Ќе разговараме и ќе ги воочиме проблемите што ја тиштат младината во Македонија, како невработеноста и масовното иселување на младите луѓе, потоа ќе работиме на решавање на овие ситуации, истакнува новиот директор на официјалниот Фејсбук профил на АМС.

Каевски потенцира дека поголемиот ангажман кон делот за младите лица во Македонија никако нема да значи запоставување на спортските активности и комуникацијата со спортските федерации.

- Ние во ниту еден план нема да го оставиме спортот во позадина. Напротив, ќе ја продлабочиме соработката со федерациите и ќе му дадеме уште позначајно место на спортот во животот во нашата држава.

АМС повторно ќе има одговорна улога околу распределбата на финансиските средства на спортските федерации, за која Каевски е дециден дека АМС ќе инсистира на наменско трошење на финансиите што ќе бидат доделени од ова државно тело.

- Прекратко време сум овде за да можам да говорам за конкретна стратегија, најпрвин ќе направиме ревизија за работата и досегашното доделување на средствата. Она што можам да кажам е дека нема да се мешаме воопшто во спортскиот дел, а единствена работа што ќе ја бараме е транспарентност во однос на трошењето кои ќе ги добиваат од АМС. Најпрвин ќе направиме детална ревизија на потрошените пари на сите федерации досега, по што ќе се направи и стратегијата за во иднина. Сакаме федерациите на нашата агенција да гледаат како на партнер за развој на македонскиот спорт, потенцира Дарко Каевски. 

Паоло Скарони именуван за нов претседател на Милан

Aмериканскиот инвестициски фонд „Елиот менаџмент“, кој неодамна ја презеде контролата над италијанскиот фудбалски клуб Милан, го отстрани од функцијата кинескиот бизнисмен Јонгхонг Ли и го постави Паоло Скарони за нов привремен претседател на клубот

Отказ доби и досегашниот извршен директор на клубот Марко Фасоне, но се уште не е познато кој ќе ја преземе оваа функција.

Воедно беа разрешени и членовите на управата, а на нивно место инвестицискиот фонд именуваше нови.

Новиот претседател Скарони најави промени во клубот, а во прилог на новото раководство оди и одлуката на УЕФА да ја прекине забраната за Милан да учество во европските натпревари. 

Чепкоеч постави нов светски рекорд на 3.000 метри со пречки во Монако

Кениската атлетичарка Беатрис Чепкоеч постави нов светски рекорд на 3.000 метри со пречки на митингот од Дијамантската лига во Монако.

Чепкоеч победи со време од 8:59.36 минути и за осум секунди го подбри претходниот рекорд на Рут Џебет од Бахреин.

За 27-годишната атлетичарката од Кенија ова е најголемиот успех во кариерата, бидејќи досега го има освоено четвртото место на Олимписките игри во Рио де Жанеиро и на Светското првенство во Лондон.

Покрај Чепкоеч, во центарот на вниманието беа и јужноафриканката Кастер Семења и Шона Милер Уибо од Бахамите.

Семења со резултат од 1:54.60 минути постави нов рекорд на митингот на 800 метри и го собори 35 години стариот рекорд на легендарната Јармила Кратохвилова.

На 400 метри Шона Милер Уибо го собори рекордот на Мари Жозе Перег поставен пред 22 години. Таа делницата ја истрча за 48.97 секунди.

Дијамантската лига продолжува и во текот на викендот. /МИА

Македонските ракометари со убедлива победа над Велика Британија го почнаа ЕХФ шампионатот

Машката младинска репрезентација убедливо ги совлада ракометарите на Велика Британија со 32:15 и со победа го почна ЕХФ шампионатот за ракометари до 20 години што ќе се игра од денеска до 29 јули во Скопје.

Избраниците на селекторот Данило Брестовац ја потврдија фаворитската улога и по победата над британските ракометари ги освоија првите поени, по што следуваат натпреварите со останатите репрезентации од групата Б - Италија, Швајцарија и со Украина.

Претходно на првиот натпревар од оваа група Швајцарија со 28:25 ја совлада Украина.

Македонија вториот натпревар ќе игра против Италија на 23 јули.

На ЕХФ шампионатот во Скопје настапуваат 11 репрезентации поделени во две групи. Македонија е во групата Б заедно со репрезентациите на Велика Британија, Италија, Швајцарија и со Украина. Во групата А се репрезентациите на Белорусија, Фарски Острови, Финска, Грција, Естонија и Литванија.

Најдобропласираните две репрезентации од секоја група ќе вкрстат во полуфиналните средби што ќе се играат на 28 јули, додека останатите селекции ќе разигруваат за пониските места на турнирот.

Финалето, натпреварот за третото место и сите останати натпревари за пласман се играат на 29 јули.

Победникот на ЕХФ шампионатот обезбедува пласман на младинското Европското првенство наредната година. 

притисни ентер