Доделени наградите за најдобрите во НБА лигата

Во конкуренција на Џејмс Харден од Хјустон и Каваи Ленард од Сан Антонио, кошаркарот на Оклахома Расел Вестбрук ја доби наградата за најкорисен играч – МВП која му беше доделена на гала-свеченост ноќеска во Њујорк.
Вестбрук сезоната 2016/17 ја заврши со просечни 31.6 поени, 10.6 скока и 10.4 асистенции по натпревар.

Признанието за најдобар одбранбен играч одтиде кај Дрејмонд од Голден Стејт. Тој ги победи Каваи Ленард и Руди Гобер.

Малком Бродон од Милвоки ја доби наградата за најдобар дебитант (Руки) на годината.

Предводникот на Хјустон, Мајк Д’Антони е прогласен за најдобар тренер на годината.

Наградата за најдобар шести играч отиде кај Ерик Гордон исто така од Хјустон, додека Јанис Адетокумбо е прогласен за кошаркар кој најмногу напредувал.

Специјалната награда за животно дело му припадна на легендарниот Бил Расел. /МИА

СП 2018: Се запали авионот на Саудиска Арабија

Авион во кој се наоѓаше експедицијата на фудбалската репрезентација на Саудиска Арабија се запали на нивното патување кон Ростов.

Пламен се појави на едно крило, но за среќа авионот слета безбедно во Ростов и трагедијата беше избегната. Огнот беше предизвикан од технички проблем со моторот на рускиот Ербас.

Од раководството на Фудбалскиот сојуз на Саудиска Арабија потврдија дека никој не е повреден и дека фудбалерите и стручниот штаб се безбедни.

- Фудбалската федерација на Саудиска Арабија сака да ве увери дека членовите на репрезентацијата се апсолутно безбедни по малиот дефект на моторот на авионот, се вели во соопштението.  /МИА

СП 2018: Кејн во финишот и донесе победа на Англија против Тунис

 Англија со гол во судиското надополнување го совлада Тунис со 2:1 во вториот натпревар од групата Г на Светското првенство во Русија.

Англичаните во првиот дел ја оправдаа фаворитската улога и доминираа на теренот, при тоа имаа неколку сериозни шанси за погодок.

Англија со голот на Хари Кејн во 18-та минута поведе со 1:0. Меѓутоа, Тунис иако потешко доаѓаше до контрола на топката успеа во 35 минута со гол од пенал, кој успешно го реализираше Ферјани Саси, да израмни на 1:1.

Англиската репрезентација и во вториот дел продолжи со притисокот врз голот на Тунис, но изостануваше реализација се до 91-та минута кога Кејн повторно беше прецизен и донесе победа од 2:1.

Во првиот натпревар од оваа група Белгија убедливо ја совлада Панама со 3:0. 

СП 2018: Белгија убедливо ја совлада Панама

Белгија убедливо ја совлада Панама со 3:0 во првиот натпревар од групата Г на Светското првенство во Русија.

Белгиската репрезентација доминираше на теренот во текот на целиот натпревар и без поголеми проблеми дојде до победа.

Првиот гол во 47 минута го постигна Дрис Мертенс, а потоа Ромелу Лукаку прво во 68 минута зголеми на 2:0, а седум минути подоцна беше прецизен за конечни 3:0.

Во вториот натпревар од оваа група во Волгоград ќе се соочат Англија и Тунис. /МИА

притисни ентер