Доделени средства на спортските федерации од Игрите на среќа

Агенцијата за млади и спорт (АМС) денеска потпиша договор со четири спортски федерации за доделување наменски донации од средствата утврдени во Законот за игрите на среќа и за забавните игри.

Ракометната федерација ќе добие 5,2 милиони денари Македонската кошаркарска федерација и Фудбалската федерација на Македонија ќе добијат четири милиони денари, додека додека Карате федерацијата ќе добие 1,5 милиони денари.

Директорот на АМС, Марјан Спасески на денешната прес-конференција потенцираше дека преку измените во Законот за игрите на среќа и за забавните игри се овозможија нови стабилни извори за финансирање на спортските федерации.

- Денеска склучуваме договор со Ракометната федерација во износ од 5.2 милиони денари, со Кошаркарската федерација во износ од 4 милиони денари, со Фудбалската федерација за настап на младите фудбалери на ЕП во Полска во износ од 4 милиони денари и со Карате федерацијата во износ од 1.5 милиони денари, за нивните настапи на меѓународните натпревари, но и за организација на меѓународните натпреварувања, чиј домаќин ќе биде Република Македонија, рече Спасески и информираше дека само досега преку овој нов извор на финансирање се поддржани 42 национални спортски федерации со вкупно 52.5 милиони денари.

Во изминатиот период се склучија и Договори за распределба на редовните буџетски средства на вкупно 44 национални спортски федерации, кои ги исполниле законските услови и имале навремена и уредна апликација, а вкупната сума на доделени средства по двата основи, односно од редовните буџетски средства и од Игрите на среќа досега се доделени вкупно 91 милион денари на 50 национални спортски федерации.

- На овој начин, убеден сум дека ќе придонесеме кон подобрување на функционирањето на спортските федерации, подобрување на резултатите на нашите селекции и секако подигнување на квалитетот на спортскиот систем во нашата земја. Новите дополнителни приходи за спортските федерации треба да бидат мотив повеќе за нивно максимално ангажирање во спортот и создавање функционален и ефективен систем, истакна Спасески.
Задоволство од новите средства изрази и генералниот секретар на Карате федерацијата на Македонија, Зоран Ѓорѓевски кој потсети на одличните резултати на нашите каратисти на неодамна завршеното ЕП во Турција и искажа благодарност за поддршката што Македонската карате федерација ја добива од Агенцијата за млади и спорт.

- АМС го препозна квалитетот на каратистите и ваквата поддршка резултираше со врвни резултати на меѓународните натпревари, а убеден сум дека Македонското карате ќе има резултати и на Олимпијадата во Токио, нагласи Ѓорѓевски.

Инаку, со оваа распределба на средства беа опфатени околу 40 федерации, кои добија околу 25 милиони денари. 

Штербик го пропушта дуелот со ПСЖ

Голманот на актуелниот еропски шампион Вардар, Арпад Штербик денеска нема да настапи за „црвено-црните“ во мечот за третото место на Ф4 турнирот во Келн против ПСЖ.

Штербик во вчерашниот меч против Монпелје, кој вардарци го загубија со 27:28, ја напушти играта поради повреда кон крајот на првиот дел и потоа не се врати на терен. На негово место шанса денеска ќе добие Даниел Ѓорѓевски.

Штербик на крајот од сезонава заминува за Веспрем, па така вчерашниот меч беше последниот во дресот на македонскиот тим.

Тренерот на Вардар, Раул Гонзалез направи уште една замена, откако на местото на Јања Војводиќ ќе настапи македонскиот репрезентативец Мартин Поповски.

Дуелот меѓу Вардар и ПСЖ почнува од 15:15 часот. /МИА

Салах неизвесен за Светското првенство во Русија

Учеството на египетскиот репрезентативец Мохамед Салах на претстојното Светско првенство во Русија е под знак прашалник.

Учеството на египетскиот репрезентативец Мохамед Салах на претстојното Светско првенство во Русија е под знак прашалник, поради повредата на рамото што ја здоби синоќа во финалниот натпревар од Лигата на шампионите на неговиот Ливерпул против Реал Мадрид.

Тренерот на Ливерпул, Јирген Клоп, најави тавов епилог уште веднаш по натпреварот.

Салах, кој постигна 44 гола за Ливерпул оваа сезона, со солзи во очите го напушти синоќа теренот во Киев, по тежкиот пад во дуелот со Серхио Рамос од Реал Мадрид.

Египќанецот се обиде да ја продолжи играта по укажаната помош, но сепак беше принуден да ја напушти играта.

Египетската фудбалска федерација на Твитер објави дека се работи за повреда на лигаментите во рамото и дека се оптимисти кога станува збор за неговото учество на Светското првенство.

Египетскиот министер за спорт и млади Калед Абдел-Азиз, на својот Фејсбук профил напиша: „Очекувањата се дека на Салах му требаат две недели за лекување. Тој ќе остане во Ливерпул, каде што ќе се опоравува, а потоа ќе се приклучи на египетскиот тим во кампот во Италија“.

Тој додаде дека Салах ќе биде во тимот, кој ќе биде објавен на 4 јуни.

Сепак, тренерот на Салах беше помалку оптимист по мечот со Реал.

- Тоа е сериозна повреда, навистина сериозна повреди. Тој е во болница, на снимање. Во прашање е или клучната коска или рамото, изјави Клоп. /МИА

Роналдо по изјавата за можно заминување од Реал: Зборовите ми беа извадени од контекст

Ѕвездата на Реал Мадрид, Кристијано Роналдо изјави дека бил погрешно разбран околу неговата иднина во мадридкиот тим во синоќешната изјава по финалето на Лигата на шампионите, во кое неговиот тим го совлада Ливерпул со 3:1.

- Сега не е време да зборуваме за лични работи, а и моите зборови можеби биле извадени од контекст. Можеби и не требаше да го кажам она што го кажав. Да се ​​освои ЛШ три пати по ред е нешто прекрасно, посебно и историско, рече Роналдо во интервју за „Фокс Спортс“.

Како што претходно јави МИА, Португалецот синоќа ја шокираше фудбалската јавност си својата изјава дадена неколку минути по завршувањето на финалето.

- Беше одлично да се игра во Реал Мадрид. По неколку дена ќе кажам нешто, ќе дадам одговор на навивачите, кои секогаш беа со мене, изјави ѕвездата на „белите“.

Претседателот на Реал Мадрид, Флорентино Перез изјави дека Кристијано е среќен на „Сантијаго Бернабеу“ и нема да го напушти тимот.

- Секој има право да зборува, но јас не сакам да се задлабочувам во тоа. Мило ми е што Кристијано има пет трофеи од Лигата на Шампионите, бидејќи и јас имам толку. Денес славиме нов европски успех, па едноставно треба да уживаме. Кристијано е среќен и ќе продолжи да се чувствува така. Јас не сум во Киев да зборувам за индивидуални играчи, туку за да славам. Реал има 13 трофеи и ги има најдобрите играчи на секоја позиција, рече Перез.

Тренерот на „кралскиот“ клуб, Зинедин Зидан исто така одби да коментира зошто Роналдо ги кажал овие зборови, додека Серхио Рамос и Карим Бензема изразија сомнежи дека Португалецот ќе го напушти „Бернабеу“. /МИА

притисни ентер