Куманово гостува кај Берое во првиот финален меч во БИБЛ лигата

Кошаркарите на Куманово попладнево ќе го одиграат првиот меч од финалето во регионалната Балканска лига (БИБЛ). Кумановци гостуваат во Стара Загора кај бугарската екипа Берое.

Избраниците на Марјан Србиновски очекуваат многу тежок дуел против екипата која сезонава покажа најмногу и имаше најдобар учинок во БИБЛ лигата. Но, македонскиот претставник најавува дека нема лесно да се предаде и шансата за конечен успех ќе ја бара во реванш натпреварот пред домашната публика во Куманово.

Во првиот дел од сезоната овие две екипи играа во рамките на А групата. Предноста на домашниот терен се покажа како клучна, па на дуелот во Стара Загора, екипата на Берое победи со 91-70, додека Куманово славеше пред своите симпатизери со 82-72.

- Берое е екипа која игра брза кошарка во постојан ритам, а тоа им го дозволува поголемиот избор на играчи во ротацијата. Наша цел треба да биде да ја анулираме нивната контра доколку сакаме да оствариме позитивен резултати, изјави тренерот Куманово, Србиновски.
За разлика од првите два меча и поголемиот дел од сезоната, Куманово сега ќе биде без услугите на двајцата носители на играта, Александар Костовски кој веќе подолг период е во Романија, и Данило Мијатовиќ кој од неодамна се врати во редовите на МЗТ Скопје.

Куманово е третиот тим од Македонија кој ќе се бори за шампионскиот трофеј. Досега само на Фени Индустри му успеа да ја освои титулата во БИБЛ лигата и тоа во третата сезона на ова натпреварување (2010-2011) кога фајнал-фор турнир се одржа во Кавадарци.

Претходно, во првата сезона (2008/2009) тогашен Фершпед Работнички во финалето загуби од бугарскиот тим Рилски Спортист.
Финалната серија ќе се игра во два натпревари, а доколку резултатот биде израмнет (1-1) тогаш ќе се смета подобрата кош разлика.
Првиот финален меч во БИБЛ лигата меѓу Берое и Куманово, денеска, ќе започне од 17:30 часот. Реваншот во Куманово е предвиден за следниот вторник (18 април) од 19 часот.

Вардар поразен и од ПСЖ

Ракометарите на Вардар го загубија мечот за третото место на Ф4 турнирот во Келн против ПСЖ со 29-28 (14-15).

„Црвено-црните“ беа подобриот тим и имаа водство во поголем дел од дуелот, одиграа подобро од вчера против Монпелје, но сепак потклекнаа на крајот и го завршија турнирот со два порази за два дена.

Лука Циндриќ беше најефикасен кај Вардар со седум гола, Македа постигна шест, а Страхиња Милиќ имаше девет интервенции.

Прв стрелец на мечот беше Недим Ремили од ПСЖ со девет гола.

Новиот европски шампион ќе биде познат по финалето меѓу Нант - Монпелје, кое е со почеток од 18 часот. /МИА

Емери за ПСЖ: Таму шефот е еден - Нејмар

Новоназначениот менаџер на Арсенал, Унаи Емери направи многу интересно откритие за својот поранешен клуб, Пари Сен Жермен и најмногу за супер ѕвездата на тимот - Нејмар.

Неколкупати во сезоната, Бразилецот создаваше проблеми во соблекувалната, а и Емери призна дека тоа било вистина. 

- Знам кога сум главна и одговорна личност и кога не сум. Ова е процес кој тренерот треба да го доживее и кој го асимилира со време и искуство. Во секој клуб треба да знаеш каква е твојата улога и каква е кон останатите. Јас сум на мислење дека лидер на ПСЖ е Нејмар, изјави Емери за „Франс Фудбал“.

Според шпанскиот стратег, Нејмар ја напуштил Барселона за Париз само за да биде во улогата на лидер - нешто, што на „Камп Ноу“ не било можно покрај Лео Меси.

- Нејмар дојде во ПСЖ да биде лидер, да помине преку овој процес и еден ден да биде најдобриот во светот. Во Манчестер Сити на чело е Пеп (Гвардиола). Во ПСЖ, тоа е во Нејмар, вели Емери.

Тој призна дека не се чувствувал удобно од огромното влијание на поранешниот играч на Барселона.

- Пред неколку месеци, играч на ПСЖ ми пријде и ми рече: „Oваа година си променет“. Беше очигледно. Не можам да сум истиот тренер со и без Нејмар. Минавме низ период на адаптација со играчот. Требаше да се запознаеме едни со други. Да ги тренираш Меси, Роналдо или Нејмар, не е лесно. Тие се најдобри во светот, па затоа мора да се прилагодите на нив. Видете го Гвардиола во Сити. Тој е среќен затоа што нема толку голема фигура против себе, изјави новиот тренер на „топџиите“. /МИА

Јувентус се насочува кон Марсијал по откажувањето на Мората

Јувентус ќе се насочи кон Антони Марсијал откако не успеа да постигне договор со напаѓачот на Челзи, Алваро Мората. 

Претставниците на италијанскиот шампион се сретнале со фудбалерот на тимот од Лондон и неговиот агент, но не постигнале договор.

Финансиските барања на шпанскиот напаѓач се причината за раководството на „бјанконерите“ да погледне кон Манчестер Јунајтед и францускиот напаѓач.

Торинското издание „Тутоспорт“ вели дека од Јувентус ќе се обидат да го убедат францускиот репрезентативец да премине на „Алијанц“ стадионот. 

Марсијал во моментов добива 3,5 милиони евра по сезона, но неговиот договор истекува летото 2019 година. /МИА

притисни ентер