Заврши кошаркарската Супер лига, познати се полуфиналните двојки за плејофот

Со двете средби до 10.коло одиграни попладнево, заврши Суперлигаташкиот дел на кошаркарското првенство на Македонија, во кое претстојат полуфиналните натпревари.
Шампионот МЗТ Скопје Аеродром со максимални десет победи ја заврши Супер лигата, откако денеска аеродромци славеа победа во дуелот со Лирија со 78:63.

Средбата без резултатско значење меѓу Струмица и Киманово заврши со победа на гостите со 72:59.

Така по десетте одиграни кола МЗТ Скопје Аеродром со учинок 10-0 (победи-порази) заврши на првата позиција. Место во плејофот обезбедија и Работнички 5-5, Кожув 5-5, Лирија 5-5, додека сезоната заврши за Куманово 5-5 и Струмица 0-10.

Полифиналната серија натпревари ќе се игра во два добиени натпревари, а ќе започне веќе претстојниот викенд со дуелите МЗТ Скопје Аеродром - Лирија и Работнички - Кожув. /Извор: МИА/

Хамилтон лесно до триумф во Франција

Британскиот возач Луис Хамилтон од Мерцедес победи на трката за Големата награда на Франција.

Втор беше Макс Верстапен од Ред Бул, додека третата позиција ја освои Кими Раиконен од Ферари, кој во последните кругови го претекна Даниел Рикиардо од Ред Бул и го остави на четвртото место.

По почетните проблеми и казната Себастијан Фетел од Ферари успеа да се најде на петтата позиција.

Во самиот старт на трката дојде до контакт меѓу Фетел и возачот на Мерцедес, Валтери Ботас, по што двајцата накратко беа надвор од патеката, но ја продолжија трката. Бидејќи до контактот дојде по грешка на Фетел, возачот на Ферари доби казна од пет секунди.

Шести беше Кевин Магнусен од Хас, а Ботас заврши како седми.

Со оваа победа Хамилтон се врати на првото место во генералниот пласман.

СП 2018: Англија ја декласираше Панама за осминафинале

Англија убедливо ја совлада Панама со 6:1 во натпревар од групата Г на Светското првенство во Русија.

Англиската репрезентација одигра одличен натпревар и благодарение на победата обезбеди пласман во осминафиналето на Мундијалот.

Англија уште во почетокот на натпреварот ја потврди фаворитската улога и со голот на Џон Стоунс во осмата минута поведе со 1:0. Англискиот капитен Хари Кејн со гол од пенал во 22-та минути го зголеми водството на 2:0. Во 36-та минута Џеси Лингард беше прецизен за 3:0, а Стоунс четири минути подоцна го постигна вториот гол и зголеми на 4:0.

Во финишот на првиот дел Кејн повторно успешно реализираше пенал за 5:0. Во второто полувреме Кејн постигна хет-трик и во 62-та минута зголеми на 6:0. Фелипе Балој го постигна почесниот гол за Панама и во 78-та минута ги постави конечните 6:1.

Белгија и Англија сега имаат по шест бодови во групата, а Панама и Тунис се без бодови.

СП 2018: ФИФА покрена истрага против Фудбалските федерации на Хрватска и на Аргентина

ФИФА покрена истрага против Фудбалските федерации на Хрватска и на Аргентина поради инцидентите меѓу аргентинските и хрватските навивачи на натпреварот во Нижи Новогород.

- Не можеме да го коментираме случајот, но можеме да потврдиме дека стигна пријава, истакна портпаролот на Фудбалската федерација на Хрватска, Томислав Пачак.

Хрватска убедливо ја совлада Аргентина со 3:0, а дел од аргентинските навивачи не можеа да го скријат својот бес поради катастрофалниот пораз и нападнаа неколку хрватски навивачи.

Претходно, ФИФА соопшти дека отворила истрага за швајцарските репрезентативци Ѓердан Шаќири и Гранит Џака, поради гестикулирањето орел по постигнатите голови, како и против Фудбалската федерација на Србија за проблемите со српските навивачи кои извикувале политички и навредливи пораки, но и против српскиот селектор, Младен Крстајиќ, за изјавите по натпреварот.

Дисциплинската комисија на ФИФА веќе ја казни Фудбалските федерации на Полска со 10.000 швајцарски франци заради полските навивачи кои извикувале политички пораки на натпреварот против Сенегал.

притисни ентер