ФИФА му дозволи на Косово да игра пријателски натпревари

Комисијата за итност при Светската фудбалска асоцијација (ФИФА) даде зелено светло репрезентацијата на Косово да игра пријателски натпревари, пренесува францускиот весник „Л‘Екип“.
Сепак ФИФА му наложи на Косовскиот фудбалски сојуз нивната репрезентација да не ги користи националните обележја. Значи на натпреварите нема да бидат интонирани државните химни и нема официјално да се истакнуваат државните знамиња.

Освен забраната за користењето на националните симболи, косовската репрезентација нема да може да игра натпревари против селекциите од поранешна Југославија.

Според најавите првата официјална пријателска средба Косово би можело да ја одигра на 5 март, а потенцијални противници му се Шведска, САД, Холандија и Бугарија.

Дозволата за играње натпревари на Косово под „капата“ на ФИФА ја оспоруваше ФС Србија со образложение дека оваа држава се уште не е признаена од ООН.

Нови одлуки околу овој спор може да се очекуваат во март за кога е закажана седница на Извршниот одбор на ФИФА.

СП 2018: Се запали авионот на Саудиска Арабија

Авион во кој се наоѓаше експедицијата на фудбалската репрезентација на Саудиска Арабија се запали на нивното патување кон Ростов.

Пламен се појави на едно крило, но за среќа авионот слета безбедно во Ростов и трагедијата беше избегната. Огнот беше предизвикан од технички проблем со моторот на рускиот Ербас.

Од раководството на Фудбалскиот сојуз на Саудиска Арабија потврдија дека никој не е повреден и дека фудбалерите и стручниот штаб се безбедни.

- Фудбалската федерација на Саудиска Арабија сака да ве увери дека членовите на репрезентацијата се апсолутно безбедни по малиот дефект на моторот на авионот, се вели во соопштението.  /МИА

СП 2018: Кејн во финишот и донесе победа на Англија против Тунис

 Англија со гол во судиското надополнување го совлада Тунис со 2:1 во вториот натпревар од групата Г на Светското првенство во Русија.

Англичаните во првиот дел ја оправдаа фаворитската улога и доминираа на теренот, при тоа имаа неколку сериозни шанси за погодок.

Англија со голот на Хари Кејн во 18-та минута поведе со 1:0. Меѓутоа, Тунис иако потешко доаѓаше до контрола на топката успеа во 35 минута со гол од пенал, кој успешно го реализираше Ферјани Саси, да израмни на 1:1.

Англиската репрезентација и во вториот дел продолжи со притисокот врз голот на Тунис, но изостануваше реализација се до 91-та минута кога Кејн повторно беше прецизен и донесе победа од 2:1.

Во првиот натпревар од оваа група Белгија убедливо ја совлада Панама со 3:0. 

СП 2018: Белгија убедливо ја совлада Панама

Белгија убедливо ја совлада Панама со 3:0 во првиот натпревар од групата Г на Светското првенство во Русија.

Белгиската репрезентација доминираше на теренот во текот на целиот натпревар и без поголеми проблеми дојде до победа.

Првиот гол во 47 минута го постигна Дрис Мертенс, а потоа Ромелу Лукаку прво во 68 минута зголеми на 2:0, а седум минути подоцна беше прецизен за конечни 3:0.

Во вториот натпревар од оваа група во Волгоград ќе се соочат Англија и Тунис. /МИА

притисни ентер