Други спортови

Бугаринот Жељасков нов селектор на одбојкарската репрезентација на Македонија

Бугарскиот тренер Николај Жељасков од денеска ја предови сениорската одбојкарска репрезентација на Македонија. Новиот селектор на оваа позиција доаѓа на местото на Александар Тасевски.

Жељасков досега како тренер има работено во екипи во Бугарија, Грција, Италија, а бил и селектор на младинските селекции на Бугарија. Како играч има играно во Бугарија, Грција, Бразил и Италија, а на ЛОИ во Атланта 1996 година бил прогласен за најдобар среден блокер на Игрите.

- Прифатив да работам со македонската репрезентација. Во стручниот шаб е мојот колега Георги Петров. Имаме доволно време за подготовки, а имав можност да погледам и неколку натпревари на Македонија одиграни минатата година. Потребно е да се направи добра атмосфера во тимот, истакна новиот македонски селектор на денешната прес конференција.

За нешто повеќе од три недели репрезентацијата ја очекуваат и квалификациите за Светското првенство, каде нашата селекција ќе настапи за првпат.

- Нема лесни ривали во квалификациите. Можеби Албанија е селекција со најслаб квалитет, но јас не потценувам никого. Натпреварите со Црна Гора и со Украина ќе бидат потешки, но ако ние функционираме како тим, само така имаме шанси за првото место во групата.

Македонија е домаќин на квалификациите, кои од 24 до 26 мај ќе се одиграат најверојатно во Скопје, во СРЦ „Кале“, но за тоа е потребно да се постигне договор со ракометниот клуб Вардар Про. Резервна варјанта е салата „Гемиџии“ во Велес.

Подготовките на репрезентацијата почнуваат денеска и ќе се одвиваат во Крушево, каде ќе се тренира до 12 мај, потоа се заминува за Босна и Херцеговина каде е закажан еден пријателски натпревар и потоа следуваат три контролни дуели со Хрватска.

Првопласираната селекција од квалификационата група ќе игра директно во третиот круг квалификации за СП, додека второпласираните селекции од шесте групи ќе играат меѓусебе за пласман во третата фаза од квалификациите.

На подготовките во Крушево ќе доцнат играчите од Вардар и од Струмица, кои ја играат финалната серија од плеј-офот, а поради клупски обврски (Катар) подоцна ќе се приклучи и Вук Карановиќ. Поради повреда до недела од обврските е ослободен Ѓоко Јосифов, која има двонеделна терапија.

Свет

Руски воен репортер загина во Украина

Воениот известувач на рускиот весник „Известија“ Семјон Еремин, загинал во напад на украинско беспилотно летало во југоисточна Украина, објави весникот.

Нападот се случил вчера кога 42-годишниот Еремин и неговата екипа се враќале од снимање од селото Прјутне, во близина на линијата на фронтот во регионот Запорожје.

Украина досега не го коментираше настанот.

Најмалку 15 новинари се убиени од почетокот на руската инвазија на Украина во февруари 2022 година, според Комитетот за заштита на новинарите, непрофитна организација која се залага за слобода на медиумите ширум светот. /МИА

НБА

Леброн: Јокиќ е еден од најдобрите на сите времиња

Првата ѕвезда на Лос Анџелес лејкерс, Леброн Џејмс искажа комплименти за центарот на Деневер, Никола Јокиќ.

Лејкерси ќе се сретнат со Нагетс во 1. коло од плејофот, а дуелот Џејмс – Јокиќ предизвикува големо внимание кај светската кошаркарска јавност.

- Еден од најдобрите досега. Едноставно е таков. Јокиќ може се. Што е најважно, тој го менува начинот на кој неговите соиграчи размислуваат за сопствената игра. Кога некој може да ги инспирира другите да играат на ниво на кое не ни знаеле дека можат, тоа е доказ дека зборуваме за навистина одличен играч, рече Џејмс.

Првата средба во плејоф пресметките меѓу Лос Анџелес лејкерс и Денвер нагетс е закажана за утре. /МИА

Свет

Претставничкиот дом на САД треба да гласа за големиот пакет помош за Украина, Израел и Тајван

По неколкумесечно одложување, Претставничкиот дом на американскиот Конгрес денеска треба да гласа за големиот пакет помош за Украина, Израел и Тајван, вреден 95 милијарди долари, како и за евентуалната забрана на ТикТок во САД.

Предлог-законите се резултат на повеќемесечни тешки преговори меѓу демократите и републиканците, како и притисокот од сојузниците на САД и постојаните молби за помош од украинскиот претседател Володимир Зеленски.

Законите, сепак, сè уште имаат гласни противници во Конгресот, а надежите за усвојување зависат од кревката двопартиска коалиција која се обидува да ги надмине големите процедурални и законодавни пречки, пренесува Би-Би-Си.

Спикерот на Претставничкиот дом Мајк Џонсон изјави дека е решен да ги поднесе законите на гласање, и покрај фактот што радикалните републиканци може да побараат негово разрешување.

Предлогот предвидува 60,8 милијарди долари помош за Украина, 26,4 милијарди долари за Израел и 8,1 милијарди долари за индо-пацифичкиот регион, вклучувајќи го и Тајван.

Претставничкиот дом ќе гласа за секој предлог-закон поединечно, што значи дека некои може да поминат, а некои не.

Претседателот Џо Бајден и демократските пратеници во Конгресот со месеци се залагаат за нов голем пакет оружје за Украина, но републиканците под влијание на нивниот претседателски кандидат Доналд Трамп, ја условуваа помошта.

Со усвојување на законите, исто така, ќе му се овозможи на Бајден да конфискува и продава руски имот, а средствата да ги намени за помош на Украина, потег што беше прифатен и од другите земји од Г7.

Претставничкиот дом ќе ја разгледа и предложената законска одредба со која треба да се принуди ТикТок да се откаже од кинеската матична компанија ByteDance или ќе се соочи со забрана во САД, каде што има околу 170 милиони корисници.

Белата куќа соопшти дека „силно го поддржува“ вкупниот пакет помош и оти Бајден ќе ги потпише законите веднаш штом бидат усвоени од двата дома на Конгресот.

Тоа би можело да се случи за неколку дена, бидејќи лидерот на мнозинството во Сенатот, Чак Шумер, вети дека Сенатот со мнозинство од демократите брзо ќе преземе мерки штом бидат усвоени од Претставничкиот дом.

Сепак, политичките аналитичари во САД оценуваат дека усвојувањето на законите во Претставничкиот дом, би можело да го чини спикерот Мајк Џонсон губење на спикерското место. Неколку екстремно десничарски републикански пратеници предупредија дека може да го соборат Џонсон поради поддршката на нацрт-законите. /МИА