Менди потпиша за Вардар СЦБТ

Французинката Клодин Менди им се придружи на своите сонароднички Амандин Лејно и на Сираба Дембеле кои следната сезона ќе го засилат составот на ЖРК Вардар СЦБТ.

Како што јави МИА,  левиот бек на француската репрезентација со „црвено-црните“ потпиша едногодишен договор, со можност за продолжување на соработката.

- Со ангажманот на Клодин Менди добиваме големо засилување на бековската позиција. Уште едно големо име во европскиот ракомет се приклучува во нашиот состав што го градиме за следната сезона. Исклучително сме задоволни што преговорите имаа позитивна завршница и очекуваме успешна соработка. Пред нас е еден голем и амбициозен проект и создавањето на силен тим е основата на сето тоа, истакна директорот на ЖРК Вардар СЦБТ, Давор Стојаноски, по потпишувањето на договорот со Менди.

Француската репрезентативка во Скопје ќе се пресели по една сезона помината во дресот на Будуќност од Подгорица. Амбициозниот проект и силниот тим што го создава ЖРК Вардар СЦБТ ја привлекоа Менди да ја продолжи кариерата во Македонија.

- Среќна сум што верувавте во мене и ќе дадам се од себе да ја оправдам таа доверба. Ова е убав проект и јас се гордеам што ќе бидам дел од сето тоа. Ќе играм заедно со големи играчи и се надевам дека ќе научам многу, изјави Менди за официјалната веб страна на клубот.

Досега Менди има настапувано за Будуќност, Авр и Мец. Таа со репрезентацијата на Франција има освоено сребрен медал на СП 2009 во Кина и на СП 2011 во Бразил, 5.место на ОИ во Лондон и 9.место на ЕП 2012 во Србија.
притисни ентер