Вилмотс: Колективната игра е она што ја краси Македонија, но опасни се и од прекини

Колективната игра е она што ја краси репрезентацијата на Македонија, а опасни сте и од прекини, односно од слободни удари и корнери.

Ова денеска го потенцираше селекторот на белгиската фудбалска репрезентација Марк Вилмотс на последниот тренинг во Брисел пред утрешното заминување на „црвените ѓаволи“ за Скопје за натпреварот против нашиот национален тим кој ќе се одигра в петок.

- Се разбира, не би требало да трошам зборови за тоа колку е квалитетен и опасен Горан Пандев, додаде некогашната белгиска фудбалска ѕвезда, а сега шеф на стручниот штаб на националниот тим на „црвените ѓаволи“.

Според Вилмотс, не би било драматично ако петочниот меч на Националната арена „Филип Втори“ заврши и без победник, со тоа што Белгија би морала да оствари триумф на возвратниот натпревар во Брисел кој е закажан за вторник. - Но, јас не би бил најсреќен ако задутре не победиме, тоа е сигурно, искрен е Вилмотс.

На денешниот тренинг се повреди Стевен Дефур (Порто) и според селекторот станува збор за повреда на препоните која е можно да го оддалечи од составот за првата средба во Скопје. Ситуацијата со капитенот Венсан Компани е идентична и тој тренира издвоено од останатите и до последен момент не се знае дали ќе настапи на првиот меч, иако се големи веројатностите тоа да се случи. А, ако игра в петок, белгискиот селектор со сигурност ќе го одмори за вториот меч во вторник поради барањето од клубот Манчестер Сити.

Ако Компани не игра против Македонија, капитен на Белгијците ќе биде дефанзивецот на Арсенал, Томас Вермален. Тој вели дека тренираат напорно за петочниот натпревар и остава простор да видиме што ќе се покаже на теренот, иако потенцира дека трите бода за Белгија се многу важни.

- Имаме добар моментум на позитивни резултати кој се надевам дека ќе продолжи со Македонија. Иако требаше синоќа, денеска ќе гледаме видео-снимки од натпреварите на нашиот претстоен противник. Знам дека најголемата опасност ќе доаѓа од Пандев, тој е одличен фудбалер, а го познавам и Иван Тричковски од Бриж. Во Скопје не очекува полн стадион со бучна публика која ќе ја поддржува својата репрезентација, но ние сме навикнати да играме такви натпревари и иако нема да биде лесно, ќе се обидеме да оствариме победа, рече Вермален за МИА.

Според дефанзивецот на англиски Арсенал, во белгиската репрезентација се навистина изненадени од податокот дека македонските фудбалери добиле 17 жолти картони на четирите квалификациски средби, што, според него, покажува дека ги очекува голема борба на теренот.

- Секој меч е важен отсега натаму. Нам ни се потребни двете победи во двомечот со Македонија и мислам дека имаме тим кој тоа ќе го обезбеди. Потребно е да ги спречиме Македонците во контра-нападите, додаде Вермален.

Органиазтор на игртаа на Белгија в петок ќе бдие ѕвездата на Челзи, Еден Азар. Тој во изјава за МИА се потсетува на годинашниот дуел со Стеауа и дуелите со Даниел Георгиевски кој и на претстојните репрезентативни дуели очигледно ќе биде задолжен за брзиот и опасен полу-шпиц.

- Го паметам македонскиот бек Георгиевски од дуелите на Челзи со Стеауа. Романците имаат одличен тим каде извонредно настапува и Георгиевски. Но, го паметам и по тоа што ми зададе голем број на удари во дуелите, вели Азар.

Сепак, според плејмејкерот на Челзи и Белгија, неговата репрезентација оди по победа во Скпоје, но и реми нема да биде катастрофа.

- Мојот колега во Челзи, Бранислав Ивановиќ, ми вети дека со репрезентацијата на Србија ќе ја победат Хрватска во Загреб, како негов подаорк за мене, па би било штета ние тој подарок да не го искористиме со две победи против Македонија, вели Азар.

Иако селекторот Вилмотс не сака да ги открие 11-мината со кои Белгија ќе истрча на првиот меч во Скопје, белгиските новинари веќе го откриваат составот на „црвените ѓаволи“. Според нив, на голот ќе биде Тибот Куртоа, во одбраната би биле Алдервиелд, Вермален, Компани или Ванн Бајтен и Вертонген. Дефанзивни играчи за врска се стандардните Вицел и Дембеле, по крилните позиции се очекува да атакуваат Азар и Де Брујн, Фелаини се очекува д аигра зад напаѓачот каде селекторот се мисли дали да настапи од првата минута со Бентеке или со талентираниот Лукаку. 

Македонија и Белгија во рамки на квалификациите за пласман на Светското првенство во Бразил во 2014 година ќе се сретнат в петок со почеток во 20:45 часот во Скопје, а четири дена подоцна, во вторник, истите селекции повторно ќе ги одмерат силите на сталот „Руи Бодуин“ во Брисел.

притисни ентер