Македонија

Средбите во Виена во фокусот на грчките медиуми

Вчерашната билатерална средба на шефовите на дипломатиите на Грција и Македонија, како и денешната заедно со медијаторот Нимиц се најдоа во фокусот на грчките медиуми, а прашањето со името, повторно, се искачи високо на агендата на новинарите кај јужниот сосед. Медиумите, за средбите во Виена велат дека се „ненадејни“ и за “интензивирање на разговорите за името“.

Како што јавува дописникот на МИА од Атина, дел од медиумите во Грција коментираат дека нацрт спогодбата од грчката страна е подготвена и ќе биде презентирана во Виена, а дел, како што вчера објави МИА, дека сѐ уште се работи на неа, а Коѕијас на Димитров ќе му ја претстави во Скопје при патувањето со директен лет од Атина, веднаш штом и во пракса се промени името на скопскиот аеродром.

Коѕијас, говорејќи за државната ТВ ЕРТ пред две седмици, рече дека нацрт спогодбата ќе биде готова кон средината на февруари.

- Еден ден по ненадејната средба на двајцата министри за надворешни работи, интересот се префрла на контактите што ќе ги имаат со Нимиц. Останува непознато како ќе се движи грчката страна во однос на спогодбата што ја подготвува владата за комплетно решавање на прашањето. Односно, дали ќе му претстави на Нимиц некаков прелиминарна драфт верзија или ќе ја достави кога ќе биде завршена, објави „То Вима“.

„Катимерини“ пишува дека контактите го потврдуваат интензивирањето на преговорите, а според дипломатски извори на весникот, во следните седмици дополнително ќе се згуснат овие контакти и средби.

- Денеска се испитуваат следните чекори во преговорите меѓу Грција и ПЈРМ, на состанок на двајцата министри за надворешни работи, Никос Коѕијас и Никола Димитров, со посредство на специјалниот претставник на ОН, Метју Нимиц. Вчера, двајцата министри имаа билатерална средба во Виена, која што беше ненадејно најавена синоќа и од три страни (Атина, Скопје, ОН), без да се знае нешто друго, пишува „Катимерини“ и додава дека веројатно е двајцата министри да се сретнат во Софија во четврток и петок.

На 15 и 16 февруари во Софија ќе се одржи неформалниот состанок на министрите за надворешни работи на ЕУ (ГИМНИХ) на кој ќе присуствуваат и двајцата министри за надворешни работи. И покрај тоа што грчките медиуми во изминатите денови најавуваа дека Димитров и Коѕијас ќе се сретнат во бугарската престолнина, сепак, за тоа не постои официјална потврда. Веројатно е дека во зависност од тоа како ќе се движат разговорите во Виена, ќе се одредат и следните чекори.

Грчките медиуми, во нивните текстови, јавува дописникот на МИА од Атина, ја споменуваат и посетата на Зоран Заев на Турција и средбите што македонскиот премиер ги имаше со турскиот државен врв.

- Поддршка од Турција во напорите на Скопје да се интегрира во НАТО, побара и како што беше целосно очекувано, доби, премиерот на ПЈРМ Зоран Заев при неговата дводневна посета на Анкара, пишува „Катимерини“. /МИА

Фудбал

Покетино: Кавгата за пеналот покажува дека имаме многу да учиме

Тренерот на Челзи, Маурисио Покетино беше исклучително задоволен од играта на неговиот тим во победата над Евертон со 6:0. Сепак, Покетино ја посочи ситуацијата околу изведување на пеналот како недозволива.

Имено, по дваесетина минути од почетокот на второто полувреме беше досуден пенал за „сините“ и тогаш околу тоа кој да го изведе се натегнуваа Николас Џексон и Кол Палмер.

-Не ми се допаднаа расправиите пред пеналот. Ние сме млад тим со многу за учење. Зборував со момчињата по натпреварот и се надевам дека никогаш повеќе нема да видиме вакво нешто. Им се извинувам на навивачите. Фудбалерите мора да се однесуваат како професионалци. Сите знаат дека пеналите ги изведува Кол Палмер, објасни Аргентинецот.

Челзи е во серија од осум натпревари без пораз. Екипата на „Стемфорд Бриџ“ последен пат загуби (0:1) на 25 февруари од Ливерпул.

Следен натпревар на „сините“ е полуфиналето од ФА Купот против Манчестер сити.

Свет

Нацрт законот за американската помош за Украина се очекува да биде гласан неделава

Мајк Џонсон, спикер на Претставничкиот дом на американскиот Конгрес, неделава ќе свика одделно гласање за новата помош за Израел и Украина.

Претходно, нацрт законот предвидуваше едно гласање за оваа меѓународна воена помош, но тоа беше пречка во усогласувањето.

Одлуката на спикерот да се гласа по прашањето за помошта на Украина ги зголемува шансите за излез од ќорсокакот во кој се најде Конгресот уште од октомври минатата година, кога претседателот Џо Бајден побара итна помош за одбраната на Киев од руската инвазија.

Помошта за Израел, Украина и Тајван ќе бие разделена на четири одделни нацрт закони „и тоа може да се случи уште неделава“ изјави Џонсон синоќа. Ова се случува после речиси два месеца откако Сенатот гласаше за првичниот законски проект што ги опфаќаше трите земји во едно решение.

Очекувајќи средба со колегите реубликанци, спикерот синоќа изјави дека долниот дом ќе разгледа четири нацрт закони, од кои три за помошта за трите земји а четвртиот за националната безбедност на САД.

-Знаеме дека светот гледа во нас, да види како реагираме. Луѓето следат по тоа дали Америка може да застана во одбрана на своите сојузници, заштитувајќи ги своите интереси низ целиот свет. И ние тоа ќе го направиме, изјави тој.

Влијанието на Џонсон врз раздробеното републиканско мнозинство уште повеќе се засили благодарејќи на претседателскиот кандидат на републиканците, Доналд Трамп, кој во говор викендов во неговиот ресорт Мар-а-Лаго во Палм бич, Флорида, изрази подршка за идејата на спикерот.

Бајден повика Конресот да ја усвои помошта за Украина

Претседателот на САД Џо Бајден повика Претставничкиот дом веднаш да го стави на гласање финансирањето за воена помош на Украина и Израел, веќе речиси два месеца усвоено од Сенатот. Тој ова го повика синоќа за време на средбата со чешкиот премиер Петр Фиала во својот кабинет во Белата куќа.

Целта на Бајден е да ги истакне напорите што другите нации ги прават за поддршка на Украина.

Неговите коментари уследија по најавата на чешката влада дека испраќа еден милион парчиња артилериска муниција во Украина, за која Киев вели дека е многу потребна на воениот фронт а против Русија.

-Како што се сеќава Чешка, Русија нема да застане со Украина, рече Бајден.

Тој апелираше до Конгресот да го усвои дополнителното финансирање за да може САД да го сторат својот дел за помош на Украина во одбраната од руската инвазија.

Фудбал

Макрон очекува Реал да го пушти Мбапе на Олимпијадата

Претседателот на Франција, Емануел Макрон, се надева дека Реал Мадрид нема да го спречи Килијан Мбапе во евентуалното учество во францускиот олимписки тим на Игрите во Париз.

Нема официјална потврда дека актуелниот играч на Пари Сен Жермен по завршувањето на сезоната ќе се пресели на Сантијаго Бернабеу, но повеќе информации тврдат дека трансферот е веќе договорен.

Тогаш Мбапе веќе треба да биде играч на Реал, а во принцип клубот има право да го суспендира за Олимпијадата. Сепак, поради нивната организација, Французите сакаат да ја имаат својата најголема ѕвезда во составот.

-Ќе дадеме максимум за да имаме силен тим на Игрите. Верувам и во француските и во останатите европски клубови дека ќе ги пуштат своите играчи ако добијат репрезентативен повик, рече Макрон.

Потоа беше прашан од дописникот на „Ас“ дали мислел на претседателот на Реал Мадрид, Флорентино Перез. „Да, токму на тоа мислев“, одговори шефот на државата на Франција.