Отворен Музејот на илегалните работилници за изработка на оружје во Скопје од НОВ

Скопскиот градоначалник Петре Шилегов денеска го отвори Меморијалниот музеј на илегалните работилници за изработка на оружје во Скопје за време на НОВ (1941-1944). Лоциран е на левиот брег на реката Вардар, на кејот „Димитар Влахов“, зад Археолошкиот музеј на Македонија.

Музејот ќе биде отворен секој работен ден со дежурен кустос и ќе биде дел од туристичката мапа на главниот град. Посетителите ќе можат да ја погледнат постојаната поставка „Хероите на градот на Вардар“ на авторката Зоја Богдановска, виш кустос историчар. Посетителите ќе можат на таблети да ја видат целата поставка, а секој експонат е опишан на современ, дигитален начин.

- На 13 ноември минатата година, на Денот на ослободувањето на нашиот град најавив дека многу скоро, повторно ќе го отвориме овој Музеј, кој неправедно беше затворен долги години поради реновирање, рече Шилегов.

Според него, поранешната власт намерно ја фрлила на маргините антифашистичката и современата историја на Скопје, а спомениците, бистите и спомен-плочите поветени на НОВ биле намерно запуштени и неодржувани.

- Со отворање на овој Меморијален музеј на илегалните работилници за изработка на оружје во Скопје за време на НОВ го почнуваме токму спротивниот процес. Историјата на антифашистичко Скопје, на партизаните, на диверзантските групи, на Првиот скопски партизански одред повторно ќе биде дел од градските културни политики, одбележувања и останати содржини. Некогаш позната, а сега заборавена, оваа илегална партизанска оружарница од денес е повторно достапна за граѓаните на Скопје и за другите посетители како вредно културно-историско наследство од современата македонска историја, потенцира Шилегов.

Тој истакна дека повторното отворање на Музејот симболично се случува денеска, кога пред 75 години по долго физичко измачување во огласната полициска управа во Скопје и без судски процес свиреп биле убиени нашите народни херои Страшо Пинџур и Мирче Ацев. Во овие простории била сместена работилницата на Серафим Видовски и била опремена со најнеопходниот електромеханичарски рачен и статичен алат.

На отворањето на Музејот присуствуваа министерот за култура Роберт Алаѓозовски, претседателот на Градскиот одбор на Сојузот на борци од НОАВМ Трајко Стаматовски, учесници во НОВ и членови на нивните семејства и претставници од семејството на Серафим Видовски.

Новата изменета и надополнета поставка е сместена во целосно санираниот простор на тајната работилница, зачувана во својот автентичен изглед, која во 1981 година била пренаменета во музеј. Со поставувањето на деведесетина зачувани музејски експонати се будат сеќавањата за илегалната работилница што се користела за изработка на оружје за партизанските одреди, но и други експонати коишто се поврзани со времето на Втората светска војна.

Со повторното отворање на Меморијалниот музеј на илегалните работилници, Музејот на град Скопје го добива својот втор депанданс во стариот дел на градот, кој е единствен од ваков вид во Република Македонија и ја збогатува со уште една значајна содржина културната понуда на Скопје. 

Седуммина полицајци повредени во насилните протести пред Собранието

Седуммина полицајци се повредени и тројца цивили се приведени во насилните протести пред Собранието на Македонија, јави МИА повикувајќи се на полициски и болнички извори.  

Екипа на Итната медицинска помош интервенираше вечерва поради повредени лица во насилните протести што се одржаа пред Собранието. Возилото е се уште на местото на протестите, но засега нема информации за број на повредени граѓани.

Медицинскиот тим интервенирал по барање на полицијата.

Македонската полиција со солзавец растера насилни демонстранти пред Собранието кои протестираа незадоволни од Договорот за решавање на македонско-грчкиот спор за името и стратегиско партнерство потпишан денеска во Псарадес.

Демонстрантите фрлаа кон полицијата шок-бомби, пиротехнички средства и камења. Полицијата возврати откако дел од нив ја турнаа заштитната ограда и се обидоа да влезат во Парламентот.

Протестот беше организиран преку социјални мрежи. /МИА

Утре променливо облачно со локален пороен дожд и грмежи

Времето утре променливо облачно на повеќе места ќе дува засилен северен ветер. Попладне ќе има нестабилност со локален пороен дожд и грмежи. УВ индексот ќе изнесува 7. Минималната температура од 11 до 18 а дневната највисока температура на воздухот

Во Скопје променливо облачно со сончеви периоди и со повремено засилен северен ветер. Температурата од 16 до 31 степен.

Во вторник се очекуваат повремени врнежи од дожд кои локално ќе бидат поројни со грмежи, особено попладнето. Во среда како и во следните два дена ќе биде  сончево со мала до умерена облачност, попладне со услови за појава на краткотраен дожд. Дневните температури ќе бидат во пораст, освен во вторник кога  ќе опаднат за неколку степени. /УХМР

Протест пред Собранието против Договорот со Грција

Пред Собранието на Македонија се одржува протест против Договорот за решавање на македонско-грчкиот спор за името и стратегиско партнерство. Протестот е организиран преку социјални мрежи.

Насобраните граѓани го блокираа булеварот „11 Октомври“ пред собраниската зграда, пред која е поставен полициски кордон.

Дел од учесниците во протестите фрлаат камења и факли кон полицискиот кордон. 

Тие укажуваат дека граѓаните се тие кои одлучуваат за својата и иднинатата на државата. 

Учесниците во протестот извикуваат пароли „Македонија, не го даваме името“ и пејат патриотски песни.

Шефовите на дипломатиите на Македонија и Грција, Никола Димитров и Никос Коѕијас денеска во Псарадес ги ставија своите потписи на договорот за решавање на македонско-грчкиот спор за името и стратегиско партнерство, во присуство на премиерите Зоран Заев и Алексис Ципрас.

На церемонијата присуствуваа високи претставници на ЕУ, на ОН и бројни новинари. Двајцата премиери меѓусебно се нарекоа пријатели, оценувајќи го потпишувањето на договорот како историски ден. /МИА

притисни ентер