Историска средба и историски „препукувања“ - затегната атмосфера во претседателската палата меѓу Павлопулос и Ердоган

Лозанскиот договор и неговата евентуална ревизија– причина грчкиот и турскиот претседател да си упатат остри пораки, да го прекршат протоколот, и почетниот дијалог во премиерската палата од кратки и поздравни изјави да се претвори во долга дебата со пинг-понг обвинувања.
 Ситуацијата на почетокот на средбата на Ердоган и Павлопулос се чини дека излезе од контрола. Се започна кога грчкиот претседател го спомена Лозанскиот договор, за кој турскиот претседател во синоќешното интервју за грчката ТВ Скај, рече дека е потребна ревизија и ажурирање. Павлопулос пак, потенцираше дека за тој договор не се преговара. Ердоган го спомена и малцинство во областа западна Тракија кое за Турција е „турско“, а Грција го признава само под терминот „муслиманско“.

„Лозанскиот договор, за нас за Грците, договор кој како што знаете, меѓу другото ги одредува и границите, територијата и суверенитетот на Грција, но и на Европската унија,за овој договор, не се преговара. Овој договор нема никакви празнини и не е потребно ниту ревидирање ниту ажурирање. Овој договор е во сила, таков каков што е, целосно ги покрива темите што треба да ги покрие. И потенцирам дека, меѓу другото, овој договор ги средува и темите поврзани со малцинствата, одредувајќи дека во Грција постои религиозно муслиманско малцинство чии права се почитуваат. “ – рече грчкиот претседател.

„Во однос на Лозанскиот договор, мислам дека постојат некои нерешени прашања кои не се правилно разбрани. Ова е договор потпишан пред 94 години и не е договор потпишан само меѓу Грција и Турција, туку постоеја 11 земји кои беа дел од неа.  Во овој период од 94 години одново се гради светот, нашата планета,  многу работи се сменија и се појавија нови прашања меѓу Грција у Турција во овој период. На пример рековте дека во Лозанскиот договор, се карактеризира како муслиманско малцинството во Грција. Тоа е точно, но во исто време во Европскиот суд за човекови права постои се споменува турско малцинство. “– рече турскиот претседател Ердоган.

Несогласувањето меѓу двајцата претседатели доведе до прекршување на протоколот кој предвидува куси, поздравни и протоколарни изјави, и започнување дијалог околу меѓународното право. Павлопулос зеде збор за, како професор по уставно право да му објасни Ердоган дека договорите не се ревидираат туку се толкуваат и побара од него да избегнува правни изрази, на што турскиот претседател одговори дека не сакал воопшто да го споменува Лозанскиот договор, но прашањето го отворил Павлопулос, додавајќи дека не професор по право, но го познава политичко право.

Приведени 12 странски државјанки во локал во Желино

При контрола во угостителски објект лоциран на регионалниот пат Тетово - Скопје, во село Желино ноќеска полицијата привела 12 странски државјанки.

Како што е наведено во полицискиот билтен, ноќеска во периодот од 23:00 до 02:30 часот полициски службеници од СВР Тетово извршиле контрола во Угостителски објект лоциран на регионалниот пат Тетово - Скопје, поточно во село Желино, сопственост на З.С. од село Желино.

Во објектот биле затекнати 12 лица-странски државјанки, од кои 11 лица од Албанија и едно од Косово кои биле приведени во Полициска станица Тетово за понатамошна постапка. /МИА

ИК на ВМРО-ДПМНЕ бара техничка влада по пржинскиот модел пред секои избори

Реализирање на веќе договорените концепти за финансирање на партиите и формирање техничка влада по пржинскиот модел пред секои избори се ставовите на кои останува опозициската ВМРО-ДПМНЕ.

Ова беше потврдено на синоќешниот состанок на Извршен комитет на партијата, на кој се анализираше актуелната политичка ситуација и прашањата што се дел од меѓупартиските разговори со власта на претседателско ниво.

„Само на овој начин избирачите ќе имаат гаранција дека власта нема да го злоупотреби нивниот глас, односно дека опозицијата ќе има можност соодветно да дејствува при сите обиди за можен фалсификат и нема да се дозволи повторување на локалните избори. Обидите на Зоран Заев да ја манипулира јавноста со измислени образложенија дека некој бара амнестија за некаков криминал беа оценети како несериозни“, се вели во соопштението на партијата.

Во врска со формулацијата на референдумското прашање ИК на ВМРО-ДПМНЕ смета дека за да се согледа јасно волјата на граѓаните мора да се почитува законот што предвидува недвосмислени прашања.

ИК му даде целосна и недвосмислена поддршка на партискиот лидер Христијан Мицкоски да ги застапува ставовите на партијата во натамошниот тек на лидерската средба.

„Македонските граѓани заслужуваат власт која вистински ќе се води по европските принципи за почитување на Уставот и законите, особено за важни прашања поврзани со носење на одлуки за иднината на државата како што се македонските интеграции во Европската унија и НАТО“, се наведува во соопштението. /МИА

Потешко повредено шестгодишно дете по удар од автомобил

Шестгодишно дете е потешко повредено на регионалниот пат Хиподром-Јурумлери откако автомобил удрил во него.

Во незгодата детето се здобило со тешки телесни повреди и било пренесено и задржано во комплекс клиники „Мајка Тереза“.

Извршен бил увид на местото на настанот и се работи на целосно расчистување на случајот.

Како што информира МВР, вчера околу 15:30 часот во СВР Скопје било пријавено дека патничко моторно возило „Сеат“ со скопски регистерски таблици управувано од Ј.И. (58) од Скопје удрило во дете на возраст од шест години на регионалниот пат Хиподром - Јурумлери, кај место викано „Дунек“. /МИА

притисни ентер