Коѕиас ја повикува и охрабрува Македонија да направи компромис

Во следните 6 месеци ќе видиме дали моите пријатели од соседната земја ќе ја стават раката на срце и ќе решат да направат компромис – вели шефот на грчката дипломатија во интервјуто за грчкиот весник „Етнос“ и потенцира дека треба да се постигне праведен компромис од двете страни.
„Следните 6 месеци ќе покажат дали моите пријатели од соседната земја ќе ја стават раката на срце и ќе решат да направат компромис. Еден праведен, а не гнил компромис. Можат да го сторат тоа, доволно е да веруваат и да добијат поддршка од нивните пријатели. Исто така, мислам дека мерките за градење доверба придонесоа кон ваква перспектива.“ -  објаснува Коѕиас и уште еднаш го повторува неговиот став дека во минатото некои Европејци ја поттикнувале Македонија да не прави компромиси.

„Мислам дека сите наши соговорници разбираат дека треба сите страни да прифатат еден праведен компромис. Да функционираат врз основа на компромиси и консензуси со принципите. Ова се однесува на оние Европејци кои во минатото му создадоа илузии на државниот врв на пријателската земја, дека патот за интеграција во ЕУ и во другите институции може да се отвори без компромиси. Во случајот на ФИРОМ, нашите соседи веруваа дека можат да стигнат до интеграција во институциите без договор со нас- нешто што е невозможно - додека пак некои од нашите поверуваа во илузијата дека неактивноста во надворешната политика е оружје. Се покажа дека за време на нашата неактивност други сили добија одличен пристап до нашите северни соседи. “ – вели шефот на грчката дипломатија во интервјуто за грчкиот весник.

Според Никос Коѕиас, интеграцијата во ЕУ, демократизацијата и европеизацијата на Македонија и Турција ќе биде во корист на Грција. Но, како што вели, потребно е да се исполнат поставените услови за европска перспектива, услови кои, според шефот на грчката дипломатија се производ на грчки предлози.

Никос Коѕиас, заедно со неговите колеги од балканските земји членки на ЕУ (Бугарија, Хрватска и Романија) денеска е во Будимпешта на средба со Вишеградската четворка, односно со министрите за надворешни работи на Полска, Чешка, Словачка и Унгарија. 



Меј за референдумот: Импресивна демонстрација на демократија

Британската премиерка Тереза Меј го поздрави резултатот од референдумот во Ирска.

Британската премиерка Тереза Меј го поздрави резултатот од референдумот во Ирска со кој се отвора патот за легализирање на абортусот, нарекувајќи го “импресивна демонстрација на демократија која покажала јасен и недвосмислен резултат“.

Меј им ја честита на граѓаните на Ирска успешната кампања “да“, пренесе „АП“.

Откако референдумот во Ирска изгласа за правото на абортус, целото внимание е насочено кон парламентот на таа земја, кој би требало сега да ги донесе новите закони за абортус.

Официјалните резултати од регерендумот кој е одржан во петокот покажаа дека 66 отсто од граѓаните на Ирска гласале за укинување на осмиот амандман на уставот на Ирска, која забранува абортус, наспрема 34 отсто од оние кои гласаа за зачувување на тој амандман.

Ирскиот премиер Лео Варадкар, после објавување на официјалните резултати порача дека денот кога референдумот се одржал претставува историски ден за неговата земја и голем чин на демократија и истакна дека неговата влада забрзано ќе работи на донесувањето на новите закони со кои абортус ќе биде легализиран во првите 12 недели од бременоста.

Повеќе од 64 отсто од граѓаните со право на глас излегле на овој референдум, што е еден од рекордите во таа земја.

Протести во Берлин: „Без ислам во Германија“, „Меркел мора да си оди“ (фото)

Неколку илјади приврзаници на германската партија Алтернатива за Германија (AfD) прошетаа низ центарот на Берлин протестирајќи против канцеларката Ангела Меркел.

Демонстрантите носеа германски знамиња, транспаренти со натписот „Без ислам во Германија“ и извикуваа „Меркел мора да си оди“, пренесува „АП“.
 

Foto: Tanjug/AP/Markus Screiber

На улиците има околу 2000 полицајци, кои се распоредени за да спречат можни инциденти, бидејќи во Берлин се организираат и контрамитинзи.

Во групите кои планираат контрамитинзи се наоѓаат и уметници и здружението на музички клубови во Берлин кои се надеваат дека ќе го “одвеат“ собирот на AfD со гласните звуци на техно музиката.

Foto: Tanjug/Markus Screiber



 

Агенцијата пренела дека на денешниот собир на AfD се очекува присуство на околу 10.000 луѓе на кои ќе им се обратат лидерите на партијата.

Алтернатива за Германија стана најголемата опозициска партија во таа земја откако минатата година на парламентарните избори освои 12.6 отсто од гласовите, под влијание на се поголемото расположение на граѓаните против мигрантите и против естаблишментот, наведува „АП“.

Димитров попладнево ќе се сретне со Могерини

Министерот за надворешни работи Никола Димитров, доцна попладнево во Брисел ќе оствари билатерална средба со високата претставничка за надворешни работи на ЕУ, Федерика Могерини.

Министерот за надворешни работи Никола Димитров, доцна попладнево во Брисел ќе оствари билатерална средба со високата претставничка за надворешни работи на ЕУ, Федерика Могерини, дознава МИА од извори во ЕУ. Засега не се открива точното време на средбата, ниту содржината на разговорите.

Утре наутро, Могерини најверојатно треба да ги брифира министрите на ЕУ за текот на преговорите за спорот со името, велат извори во ЕУ за МИА.

Министрите за надворешни работи на Грција и Македонија од Њујорк допатуваа во Брисел, но не се откриваат детали за нивна можна средба.

Димитров пред утрешниот Совет на министрите за надворешни работи на ЕУ ќе учествува на неформален појадок организиран од сегашното бугарско претседателство и идното, австриско. Како што информираат од Советот, тоа ќе биде прилика за министрите да го испрашуваат шефот на македонската дипломатија за текот на преговорите за името. /МИА

притисни ентер