ОБСЕ/ОДИХР со 336 набљудувачи ќе ги мониторира локалните избори

Мисијата на ОБСЕ/ОДИХР го започна процесот на набљудување за Локалните избори 2017. Изборите што ќе се спроведуваат во 80 општини и во Градот Скопје на 15 октомври ќе ги следат 336 набљудувачи на ОБСЕ/ОДИХР.

Амбасадорката Одри Гловер, шеф на мисијата, на денешната прес-конференција посочи дека 16 експерти на ОБСЕ/ОДИХР се веќе во земјава, а ним оваа недела ќе им се придружат уште 20 долгорочни набљудувачи, кои ќе бидат распоредени низ целата земја, во тимови по двајца, започнувајќи од 18 септември. Пред локалните избори во Македонија ќе допатуваат уште 300 краткорочни набљудувачи кои ќе ги следат изборите во сите општини во земјата.

- Важно е да се разбере дека ние само ги набљудуваме изборите и оти не се мешаме во процесот, за којшто само известуваме, рече Гловер.
Мисијата на ОБСЕ/ОДИХР ќе ја оценува усогласеноста на овие избори со заложбите на ОБСЕ и со другите меѓународни обврски и стандарди за демократски избори, како и со домашните прописи.

Набљудувачите, како што истакна амбасадорката Гловер, внимателно ќе го следат процесот на регистрација на кандидатите и гласачите, кампањските активности, работата на изборната администрација и соодветните владини институции, изборната регулатива и нејзината имплементација и решавањето на изборните спорови.

Како дел од процесот на набљудување Мисијата исто така ќе го следи и известувањето на медиумите за кампањата.
Најавени се средби со претставници на власта, политичките партии, со кандидатите за градоначалници и за советници, и со претставници на граѓанскиот сектор, медиумите и меѓународната заедница.

На денот на изборите набљудувачите ќе го следат отворањето на глчасачките места, гласањето, пребројувањето на гласачките ливчиња и сумирањето на резултатите. 

Мисијата ќе објави еден периодичен извештај во текот на својата работа, на денот на изборите, ќе биде дадена изјава за првичните наоди и заклучоци, додека конечниот извештај за набљудувањето ќе го објави околу осум недели по завршувањето на изборниот процес.

Седуммина полицајци повредени во насилните протести пред Собранието

Седуммина полицајци се повредени и тројца цивили се приведени во насилните протести пред Собранието на Македонија, јави МИА повикувајќи се на полициски и болнички извори.  

Екипа на Итната медицинска помош интервенираше вечерва поради повредени лица во насилните протести што се одржаа пред Собранието. Возилото е се уште на местото на протестите, но засега нема информации за број на повредени граѓани.

Медицинскиот тим интервенирал по барање на полицијата.

Македонската полиција со солзавец растера насилни демонстранти пред Собранието кои протестираа незадоволни од Договорот за решавање на македонско-грчкиот спор за името и стратегиско партнерство потпишан денеска во Псарадес.

Демонстрантите фрлаа кон полицијата шок-бомби, пиротехнички средства и камења. Полицијата возврати откако дел од нив ја турнаа заштитната ограда и се обидоа да влезат во Парламентот.

Протестот беше организиран преку социјални мрежи. /МИА

Утре променливо облачно со локален пороен дожд и грмежи

Времето утре променливо облачно на повеќе места ќе дува засилен северен ветер. Попладне ќе има нестабилност со локален пороен дожд и грмежи. УВ индексот ќе изнесува 7. Минималната температура од 11 до 18 а дневната највисока температура на воздухот

Во Скопје променливо облачно со сончеви периоди и со повремено засилен северен ветер. Температурата од 16 до 31 степен.

Во вторник се очекуваат повремени врнежи од дожд кои локално ќе бидат поројни со грмежи, особено попладнето. Во среда како и во следните два дена ќе биде  сончево со мала до умерена облачност, попладне со услови за појава на краткотраен дожд. Дневните температури ќе бидат во пораст, освен во вторник кога  ќе опаднат за неколку степени. /УХМР

Протест пред Собранието против Договорот со Грција

Пред Собранието на Македонија се одржува протест против Договорот за решавање на македонско-грчкиот спор за името и стратегиско партнерство. Протестот е организиран преку социјални мрежи.

Насобраните граѓани го блокираа булеварот „11 Октомври“ пред собраниската зграда, пред која е поставен полициски кордон.

Дел од учесниците во протестите фрлаат камења и факли кон полицискиот кордон. 

Тие укажуваат дека граѓаните се тие кои одлучуваат за својата и иднинатата на државата. 

Учесниците во протестот извикуваат пароли „Македонија, не го даваме името“ и пејат патриотски песни.

Шефовите на дипломатиите на Македонија и Грција, Никола Димитров и Никос Коѕијас денеска во Псарадес ги ставија своите потписи на договорот за решавање на македонско-грчкиот спор за името и стратегиско партнерство, во присуство на премиерите Зоран Заев и Алексис Ципрас.

На церемонијата присуствуваа високи претставници на ЕУ, на ОН и бројни новинари. Двајцата премиери меѓусебно се нарекоа пријатели, оценувајќи го потпишувањето на договорот како историски ден. /МИА

притисни ентер