Македонското трио „Аура“ и црногорскиот дувачки квинтет на „Охридско лето“

Програмата на „Охридско лето“ за вечер предвидува два концерти за вљубениците во класичната музичка уметност. Фестивалската сцена на катедралната црква „Света Софија“ е резервирана за македонското трио „Аура“ што го сочинуваат Страшо Темков на флејта, пијанистката Ана Гацева и фаготистот Марјан Милошевски и за црногорскиот дувачки квинтет во состав Марија Ѓурѓевиќ-Илиќ на флејта, Надица Ристиќ-Симовиќ на обоа, Ана Абрамовиќ - хорна, Антонио Насевски - фагот и Петар Гариќ - кларинет.
На програмата на првиот концерт закажан за од 20:30 часот се избрани дела на Лефебре, Јанса, Пјацола и Димушевски.

Триото „Аура“ го сочинуваат истакнатите македонски уметници Темков, Гацева и Милошевски кои работат како професори на Факултетот за музичка уметност во Скопје. Имаат реализирано многубројни рецитали како солисти и камерни музичари во Америка, Франција, Германија, Австрија, Англија, Бугарија, Азија, Африка, Србија, Словенија за кои добиваат позитивни оценки.

Критиката ги нарекува „мајстори на својот инструмент“, а поради забележителните концерти во својата земја и во странство, тие несомнено се вбројуваат меѓу најдобрите и најактивните музички изведувачи во Македонија. Триото „Аура“ има долгогодишна и богата концертна активност, изведувајќи дела од сите музички епохи и стилови, а често промовира премиерни дела од македонски композитори, напишани специјално за овој состав. Нивното заедничко камерно музицирање го карактеризира изразено чувство за експресивност, музичка симбиоза и компактност на звукот и изразот.

Вториот концерт чиј почеток е закажан за од 22 часот ќе ги претстави петте уметници од Црна Гора, кои ќе изведат дела на Цанев, Лигети, Нилсен.

Црногорскиот дувачки квинтет е оформен како резултат на долгогодишната соработка на првите инструменталисти на Црногорскиот симфониски оркестар. Водени од желбата за истражување на репертоарот создаван за дувачки квинтет, како и од потребата за постоење на еден ваков ансамбл во Црна Гора, членовите на квинтетот веќе подолго време се претставуваат на сцените на црногорските градови и надвор од границите на Црна Гора. /МИА

Трескавец интензивно се обновува

 До крајот на годинава, манастирот „Трескавец“ кај Прилеп треба да го добие својот препознатлив лик на големо духовно светилиште од 12 век и културно богатство уште од антиката. 

Пет години од последниот пожар, манастирот Трескавец постепено се обновува.

Според Никола Ѓулизибариќ, главен проект-менаџер за Трескавец од иведувачот, фирмата „Кото“ од Белград, Србија, крајниот рок за изградба на опожарените конаци е напролет, но изведувачите настојуваат до крајот на годинава манастирот да биде завршен. Ќе има трислојна заштита од пожари.

Според нашиот договор, посочи, крајниот рок да ги завршиме работите се напролет во 2019 годсина. Нагласи дека настојуваат конаците да ги завршат до крајот на годинава.

- Сега дојдовме до завршната фаза, ги почнавме занаетчиските работи и сите се радуваме да завршиме побрзо и поквалитетно. Сите материјали што ги вградуваме во конаците се првокласни и со висок квалитет. Така на пример, керамиката е од Италија, дрвото од Србија, камените плочи за покривање се од Грција, така што ги применуваме најдобрите и најсовремени материјали. Посебен акцент е ставен на противпожарната заштита. Имаме три системи за противпожарна заштита. Во овој момент се работи на проект за да се синхронизираат трите вида на заштита. Кога ќе завршиме, објектот треба да биде 100 отсто заштитен од пожари. Манастирот Трескавец и црквата „Успение на Пресвета Богородица“ се специфични што се однесува до изведбата на работите, истакна Ѓулизибариќ.

Според него, треба да се работи полека, внимателно, зашто станува збор за префинети занаетчиски изведби.

- Мора да биде приближно како што било некогаш. Имаме искуство во тоа, нашите мајстори работат на вакви објекти веќе 25 години. Трескавец е светско богатство и е меѓу 100-те најпознати во целиот свет. Има своја автентична историја, особено ископините околу манастирот кои датираат од пред нашата ера, вели Ѓулизибариќ.

Единствениот жител на манастирот Трескавец, отец Калист со голема надеж е дека наредниот Велигден ќе се прослави во обновениот манастир со многу гости. Се работи на повеќе проекти.

- Работите се во поодмината фаза. Се надеваме дека до крајот на годинава ќе го видиме крајот. Можеби некои интериерни ситници ќе останат за напролет. Како и да е, за следниот Велигден Трескавец ќе блесне со сиот свој сјај за гостите. Реконструкцијта на опожарените конаци е само еден сегмент од целиот „мозаик“ Трескавец. Југоиточното крило сѐ уште не е започнато со реновирање, а најзначаен проект е реставрацијата на црквата „Успение на Пресвета Богородица“ која датира од 12 век. Тоа заедно оди со трпезаријата која е од истиот период. Но многу битен е и третиот проект за магерницата и магерничкиот конак, а тоа е југозападниот дел на Трескавец, појасни отец Калист.

За проектот за водоснабдувањето на Трескавец, кој е исклучително тежок за реализација, потенцира дека очекуваат информација дали ќе биде оваа или наредната година.

- Има многу работа да се возобнови Трескавец. Предвидовме и простор за презентација на целото движно наследство на Трескавец. Ќе има музејска поставка, главно со 30-ина икони од 16, 18 и од 20 век, како и со ексклузивми предмети од археолошките истражувања последните четири години кои ќе ја раскажуваат приказната за Трескавец и за античката населба Колобаиса..., рече отец Калист.

И додека се обновува, манастирот Трескавец го посетуваат гости од целиот свет. Трескавец на надмосрка височина од над 1200 метри на работ на Пелагонија, под Златоврв, секогаш имал различни поклоници и туристи кои преферираат културен туризам, а и оние со авантуристички дух, бидејќи веднаш до манастирот е и полетувалиштето за параглајдеристи. /МИА

Индонезија: Силувана малолетничка осудена е на затвор поради абортус

Индонезијка, девојче од 15 години кое ја силувал нејзиниот брат осудена е на шест месеци затвор поради абортус.

Заменикот на шефот на полицијата во местото Батангари во провинцијата Џамби изјави дека девојчето и нејзиниот брат се осудени во четвртокот.

Братот, момче на возраст од 18 години, осуден е на две години затвор поради сексуален престап со малолетник.

Обвинителите барале година дена затвор за девојчето и седум години за нејзиниот брат.

На судот е речено дека девојчето е силувано осум пати од септември.

Во мај локалните жители го пронашле фетусот во близина на плантажата за палма.

Нејзината мајка е обвинета за помагање во абортусот.

Украдени пари од црква во тетовско Радиовце

Непознат сторител ноќеска украл 2.000 денари од црквата „Свети Атанасије“ во тетовското село Радиовце. 

Како што информираат од МВР, во полиција денеска било пријавено дека непознатиот сторител откако скршил прозорец влегол внатре и од шкаф наменет за чување на дарови од верниците одзел 2.000 денари по што го напуштил местото на настанот.

Извршен бил увид и се преземаат мерки за целосно расчистување на случајот. /МИА

притисни ентер