Маасикас: Вонреден извештај за Македонија зависи од проценките на ЕК, но клучот е во Скопје

Можноста за вонреден извештај за Македонија и чиста препорака за преговори зависи од проценките на ЕК. Клучот за тоа е во Скопје, во спроведувањето на реформите и во извршувањето на работите кои се наведени при претходните условени препорака, вели Мати Маасикас, заменик министер за надворешни работи на Естонија, задолжен за европски прашања во интервју за МИА.
- Тоа зависи од Европската Комисија, која треба да излезе со предлог, да ја процени ситуацијата и да види дали околностите се смениле за да може да даде чиста препорака. Клучот за тоа е во Скопје, во спроведувањето на реформите и во извршувањето на работите кои се наведени при претходните условени препорака, вели Маасикас во врска со најавата од еврокомесарот Хан за можноста за вонреден извештај за Македонија и безусловна препорака за преговори.

Тој додава дека доколку Европската Комисија реши порано да излезе со препораки или предлози за одредени земји - кандидатки, естонското претседателство ќе дејствува брзо на консолидирање на ставовите на земјите - членки.

- Оваа есен нема да го имаме пакетот за проширување од Комисијата, тоа ќе се одржи дури следната пролет, и тогаш ќе има дискусија на земјите членки на ЕУ. Обично, овој пакет извештаи е во август, но овојпат Комисијата ќе го достави дури на пролет. Веројатно нема да има голема дискусија за проширувањето за време на нашето претседавање. Сепак, доколку Европската Комисија реши да даде препораки или предлози за одредени земји - кандидатки, естонското претседателство ќе дејствува бргу со цел да ги консолидира ставовите на земјите членки. Имаме обновен оптимизам во врска со Македонија, што беше изразено од комесарот Хан, како и од мене. Можевме тоа да го видиме на средбите со министерот за надворешни работи Димитров, со вицепремиерот Османи и со Комисијата за европски прашања на Собранието. Многу е важно сега да работиме со цел да ја отстраниме условеноста на препораката, а реформскиот план на Владата, планот 3-6-9, е добра основа за тоа. Сега, да почнеме со работа, истакнува Маасикас.
Запрашан кои лекции што Естонија ги научи на патот кон ЕУ се релевантни за Македонија во евроинтеграциите со оглед дека се работи за две мали земји, естонскиот дипломат посочува на две работи.

- Прво, е да има длабоко разбирање дека реформите поврзани со ЕУ се спроведуваат во интерес на сопствената земја. Тие реформи не се спроведуваат и земјата не се реформира само со цел да се штиклираат некои точки во Брисел. Ги спроведувате за земјата да ви стане подобро место. Ние цврсто веруваме дека ако ги следите европските стандарди и европските закони, тогаш земјата станува подобро место за нејзините граѓани. Втората лекција која ја научивме, а која важи во сите земји од средна и источна Европа, е дека успешните ЕУ-интеграции зависат од силен домашен политички консензус. Сите партии во Естонија работеа со цел да обезбедиме членство во ЕУ и тоа многу и помогна на Владата. Реформите поврзани со ЕУ не беа лесни. Некои од нив се навистина скапи, на пример постигнувањето на стандардите во областа на екологијата, тоа чини страшно многу пари. Притоа, ни помогна што го имавме потребниот политички консензус, нагласува Маасикас.

За можноста за поддршка на Естонија како претседавач со Советот на ЕУ во однос на надминување на билатералниот спор за името, кој ја блокира Македонија на патот кон ЕУ,  естонскиот дипломат дециден дека е потребно земјата да биде конструктивно вклучена во процесот за негово надминување, кој се води под покровителство на ОН.

- Добрососедските односи се многу важни. На крајот на краиштата, ЕУ е клуб со истакнати членови. Членови кои добро се согласуваат меѓу себе. Оттаму, многу е важно постигнувањето на добри односи со соседите. Во врска со решавањето на спорот за името, тоа не е процес кој го води Европската Унија. Постои рамката на Обединетите нации и двете страни треба да ја следат и да работат врз неа, оценува Маасикас.
Мати Маасикас престојуваше во дводневна посета на Македонија во рамки на турнејата по земјите - кандидати за членство во ЕУ како дел од активностите на официјален Талин во својство на актуелен претседавач со Советот на ЕУ. Естонскиот заменик министер за надворешни работи задолжен за европски прашања,  покрај Скопје, претходно ги посети и Сараево и Тирана. /МИА.

Седуммина полицајци повредени во насилните протести пред Собранието

Седуммина полицајци се повредени и тројца цивили се приведени во насилните протести пред Собранието на Македонија, јави МИА повикувајќи се на полициски и болнички извори.  

Екипа на Итната медицинска помош интервенираше вечерва поради повредени лица во насилните протести што се одржаа пред Собранието. Возилото е се уште на местото на протестите, но засега нема информации за број на повредени граѓани.

Медицинскиот тим интервенирал по барање на полицијата.

Македонската полиција со солзавец растера насилни демонстранти пред Собранието кои протестираа незадоволни од Договорот за решавање на македонско-грчкиот спор за името и стратегиско партнерство потпишан денеска во Псарадес.

Демонстрантите фрлаа кон полицијата шок-бомби, пиротехнички средства и камења. Полицијата возврати откако дел од нив ја турнаа заштитната ограда и се обидоа да влезат во Парламентот.

Протестот беше организиран преку социјални мрежи. /МИА

Утре променливо облачно со локален пороен дожд и грмежи

Времето утре променливо облачно на повеќе места ќе дува засилен северен ветер. Попладне ќе има нестабилност со локален пороен дожд и грмежи. УВ индексот ќе изнесува 7. Минималната температура од 11 до 18 а дневната највисока температура на воздухот

Во Скопје променливо облачно со сончеви периоди и со повремено засилен северен ветер. Температурата од 16 до 31 степен.

Во вторник се очекуваат повремени врнежи од дожд кои локално ќе бидат поројни со грмежи, особено попладнето. Во среда како и во следните два дена ќе биде  сончево со мала до умерена облачност, попладне со услови за појава на краткотраен дожд. Дневните температури ќе бидат во пораст, освен во вторник кога  ќе опаднат за неколку степени. /УХМР

Протест пред Собранието против Договорот со Грција

Пред Собранието на Македонија се одржува протест против Договорот за решавање на македонско-грчкиот спор за името и стратегиско партнерство. Протестот е организиран преку социјални мрежи.

Насобраните граѓани го блокираа булеварот „11 Октомври“ пред собраниската зграда, пред која е поставен полициски кордон.

Дел од учесниците во протестите фрлаат камења и факли кон полицискиот кордон. 

Тие укажуваат дека граѓаните се тие кои одлучуваат за својата и иднинатата на државата. 

Учесниците во протестот извикуваат пароли „Македонија, не го даваме името“ и пејат патриотски песни.

Шефовите на дипломатиите на Македонија и Грција, Никола Димитров и Никос Коѕијас денеска во Псарадес ги ставија своите потписи на договорот за решавање на македонско-грчкиот спор за името и стратегиско партнерство, во присуство на премиерите Зоран Заев и Алексис Ципрас.

На церемонијата присуствуваа високи претставници на ЕУ, на ОН и бројни новинари. Двајцата премиери меѓусебно се нарекоа пријатели, оценувајќи го потпишувањето на договорот како историски ден. /МИА

притисни ентер