Средба Коѕиас Нимиц во Брисел за размена на мислења

Нимиц го известил за климата кај нас, Коѕиас говорел за грчките размислувања, двајцата се договориле да останат во контакт и да бараат начини за изнаоѓање решение на долгогодишниот проблем меѓу Македонија и Грција.
Медијаторт и шефот на грчката дипломатија остварија средба во Брисел, а детали од разговорите откри самиот Коѕиас.

„Имавме многу интересна и сериозна средба со господинот Нимиц, кој неодамна го посети Скопје. Ме извести за климата таму. Од моја страна, го известив за тоа како размислуваме ние, по средбите што ги имавме со новата влада на нашиот северен сосед. Се согласивме да останеме во контакти и да бараме начини на кои би можеле да отвориме еден процес за изнаоѓање решение.“ – рече Коѕиас по средбата со Нимиц во Брисел, а одговарајќи на новинарско прашање дали постојат знаци на добра волја од новата македонска влада, шефот на грчката дипломатија вели дека на комуникациско ниво да, но суштински треба да покаже.

Со идентичен став во однос на македонската влада Коѕиас излезе и в интервјуто за Euractiv кусо пред посетата на Брисел и средбата со медијаторот Нимиц.

Новата влада е покоректна, но во суштина нема ништо ново, Европа треба да ја  едуцира власта во Скопје за политички компромис и консензус, и да не создаде нов Груевски,  а за решение, најдобро е да нема мешање на трети страни – рече шефот на грчката дипломатија во интервјуто.

„На моите европски пријатели им велам, немој да создадете втор Груевски, бидејќи Заев ги има сите предуслови да разбере и да се отвори кон реално решение. Ќе работиме за ова решение и се надевам дека ќе добиеме одговор и ќе се избегне мешањето на трети страни кои ќе го отежнат пристапот кон ова решение. “ - вели Коѕиас, кој уште еднаш ги повторува неговите веќе добро познати ставови, дека нашата земја треба да ја научи културата на политички компромис и консензус, а Европа да не не разгалува како што го правела тоа во минатото.

„Сегашната влада во земјата го намали тонот (во однос на претходната реторика) и на комуникациско ниво, би рекол, дека е покоректна. Но, во суштина, немам видено ништо ново. Сепак, чекам. Кон крајот на август ќе одам во Скопје и се надевам дека со министерот за надворешни работи ќе разговараме за прашањето,затоа што последниот пат не се осврнавме на тоа. “ – коментира шефот на грчката дипломатија.



Почнува шестиот „Битола Шекспир фестивал“

Во Битола денеска ќе почне шестиот „Шекспир фестивал“ кој ќе го отвори ансамблот на домаќинот и организатор на фестивалот - Народен театар-Битола со претставата „Јулие Цезар (Res Publica  - Cosa Nostra)“ во режија на Златко Паковиќ.

Најавена е богата и квалитетна програма до 30 јуни кога фестивалот ќе биде затворен од Црногорскиот народен театар од Подгорица кој со многуброен ансамбл ќе ја изведе претставата „Зимска бајка“ во режија на Дино Мустафиќ.

На годинашниот „Битола Шекспир фестивал“ атрактивен а капела Шекспир концерт и 11 театарски претстави ќе изведат над 500 учесници од Полска, Романија, Казахстан, Италија, Хрватска и од Македонија.

Директорот на Битолскиот театар, Иван Јерчиќ, на прес-конференцијата по повод фестивалот истакна дека прават посебни подготовки за гостувањето на уметниците од Полска кои на 29 јуни ќе изведат а капела Шекспир концерт. 

- Очекуваме атрактивен концерт на хорот од Краков кој ќе биде придружуван од една од најголемите ѕвезди во Полска и Европа, уметникот Станислав Сојка. За време на концертот тој ќе приреди рецитал со сонетите на Шекспир. Во Битола ќе гостува и познатиот Театар на вечни вредности (Theater of Eternal Values) - интернационален ансамбл позициониран во Италија во кој настапуваат актери од цела Европа и кои на фестивалот ќе ја изведат претставата „Шекспировите жени“ во режија на Ерик Лорен, рече Јерчиќ.

На фестивалската програма годинава се и претставите „Ричард Трети“ на театарот „Гавела“ од Загреб. Театарот од Темишвар ќе настапи со „Шекспир сонет 66“, а од Букурешт ќе ја изведе претставата „Хамлет“. Актерите од театарот „Верди“ од Задар ќе настапат со „Отело – незаконита литургија“, а Академскиот руски драмски театар од Казахстан ќе ја изведе претставата „Ромео и Јулија“.

- На свеченото затворање на 30 јуни ќе настапи Црногорскиот народен театар од Подгорица чиј броен ансамбл ќе ја изведе претставата „Зимска бајка“. Посебно сум задоволен од учеството на театрите од нашата држава бидејќи освен Битолскиот театар, со свои претстави ќе настапат и Театарот за деца и младинци со претставата „Сонот на Вилијам“, Албанскиот театар-Скопје ќе ја изведе претставата „Макбет“, а Турскиот театар-Скопје ќе гостува со претставата „Крал Лир“, истакна Јерчиќ.

„Битола Шекспир фестивал“ се одржува со поддршка на Општина Битола и е под покровителство на Министерството за култура. /МИА

Перформанс „’Ртулци“ - прва продукција на програмата „Инкубатор“

Во „Кино Култура“ вечер од  20 часот ќе биде изведен мултимедијален перформанс насловен „’Ртулци“, создаден од младите уметници кои беа дел од првата продукција  „Инкубатор“. 

Настанот го организираат Културниот центар „Интерарт“ и Амбасадата на Швајцарија во Македонија, а ќе се обратат Рисима Рисимкин, уметнички директор на проектот, и амбасадорката на Швајцарија Сибил Сутер Тејада. 

- Музика, танц и визуелна уметност - синергија на сцена претставена низ призмата на нов бран млади креативци. Седум оригинални уметнички дела ќе пренесат приказна создадена на тримесечните работилници на „Инкубатор“, под менторство на истакнати македонски уметнички имиња, соопшти Културниот центар „Интерарт“.

Целта на културната програма „Инкубатор“ е интегрирање млади уметници во современата уметничка сцена преку професионално менторство и поддршка, што на долг рок ќе придонесе збогатување и дополнително афирмирање на младинската современа уметничка сцена во Македонија, но и надвор од границите. /МИА

Трамп имаше средба со семејствата на Американци убиени од илегални мигранти

Американскиот претседател Доналд Трамп вчера се сретна со семејствата кои ги загубиле најблиските од страна на илегални имигранти во САД.

Средбата е одговор на критиките во јавноста за праксата во некои случаи да се раздвојуваат децата на илегалните имигранти од нивните родители, додека да се завршат истрагите или процесот на депортирање.

„Се собравме денеска да слушнеме од американските жртви на илегалната имиграција. Ова се американски државјани кои се трајно разделени од нивните сакани кои биле убиени од илегални имигранти – криминалци. Медиумите ги игнорираат овие семејства. Нашата прва должност е да им бидеме лојални на граѓаните на САД. Нема да запреме додека границата не биде безбедна и додека не ставиме крај на имигрантската криза“, изјави претседателот Трамп за време на средбата.

Тој воедно ја повика јавноста да ги прима вестите од границата меѓу САД и Мексико со доза на резерва, особено откако неделникот „Тајм“ на насловната страница го обвини Трамп за разделувањето на децата од нивните мајки.

Се покажа дека во случајот кој беше посочен од страна на „Тајм“, девојчето на насловната страница воопшто не било разделено од нејзината мајка, која пак неколку пати илегално влегувала во САД и го понела девојчето на пат од Хондурас кон САД спротивно на волјата на нејзиниот сопруг и ги оставиле своите три други деца зад себе.

„Медиумите ја пренесуваат едната страна, но никогаш не ја пренесуваат вашата страна“, додаде Трамп, обраќајќи им се на семејствата чии блиски биле убиени од илегални имигранти.

Се проценува дека вкупно околу 2.000 деца биле разделени од нивните родители на границата.

притисни ентер