Инфо ден на ФЕИТ за заинтересираните средношколци

Факултетот за електротехника и информациски технологии денеска организира отворен ден за сите заинтересирани средношколци кои сакаат да студираат на Факултетот.
- Пред средношколците ќе бидат изложени разни експонати кои произлегуваат од работењето на нивните колеги во лабораториите на ФЕИТ, како и потребните информации за запишување и студирање на Факултетот - новите студиски програми, условите за студирање и уписите (квоти, префрлување од една во друга студиска група, партиципација, стидендии), соопштуваат од ФЕИТ.

Средношколците ќе може да ги разгледаат и просториите и лабораториите на ФЕИТ каде се одржува наставата. /МИА

Претпладне сончево, попладне пороен дожд, грмежи и засилен ветер

Времето претпладне ќе биде сончево со мала до умерена облачност, а  попладне на места нестабилно со пороен дожд, грмежи и засилен ветер, локално и во форма на невреме.

Минималната температура ќе се движи меѓу 12 и 20, а максималната од 28 до 36 степени. УВ индексот ќе достигне девет.

Во Скопје сончево со мала до умерена облачност, а попладне со краткотраен пороен дожд, грмежи и засилен ветер.

Утринската температура ќе се спушти до 19, а дневната ќе достигне до 35 степени.

Во следните денови во попладневните часови ќе има честа појава на пороен дожд, грмежи и засилен ветер. Локално процесите ќе бидат во форма на невреме со пообилни врнежи, силен ветер и појава на град. Максималните температури до средината на наредната седмица ќе бидат во благо опаѓање.

Тешко повреден моторциклист во сообраќајка кај Спомен-паркот „12 младинци" во Моклиште кај Ваташа

Дваесет и четири годишен моторциклист од Кавадарци бил тешко повреден  во сообраќајка кај Спомен-паркот „12 младинци" во Моклиште кај Ваташа, Кавадаречко.

– Сообраќајната незгода се случила утринава во 1.30 часот на регионалниот  пат Кавадарци – Мушов гроб, меѓу возило марка „киа" со кавадаречки регистарски ознаки управувано од 24-годишен кавадарчанец и моторцикл „сузуки" со кавадаречки ознаки управуван од 24-годишникот кој бил тешко повреден, за МИА потврди Верољуб Додевски, портпарол на СВР Велес.

Со тешки телесни повреди моторциклистот бил пренесен во комплексот  клиники „Мајка  Тереза" во Скопје. Извршен бил увид на местото на несреќата.

Избор на новото партиско раководство на денешниот Централен одбор на СДСМ

Изборот на новото партиско раководство, како и заокружување на внатрепартиските промени се очекуваат денеска на седницата на Централниот одбор на владејачката СДСМ.

Централниот одбор ќе заседава во Охрид, а деветтата седница, како што е најави партијата ќе почне во 16:00 часот.

На дневен ред се и суштинските промени во партијата, новиот систем на дејствување и работа на партијата и напредокот на државата.

Метлата, која лидерот на СДСМ и премиер Зоран Заев ја најави по завршувањето на претседателските избори почна токму во неговата партија. Сите 78 претседатели на општински организации се сменети од позициите. За тоа тој како лидер, според партискиот статут, има директна надлежност.

Разрешени се и целиот извршен одбор на СДСМ, сите шест потпретседатели на партијата, генералниот, организацискиот и меѓународниот секретар, како и координаторката на  Форумот на жени на седницата на Централниот одбор минатиот месец.

Според одлуките, што беа донесени со консензус,  разрешени беа Александар Кирацовски, генерален секретар, Миле Зечевиќ организациски секретар, Дане Талевски, меѓународен секретар, Цветанка Ласкова координатор на Форумот на жени и шесте потпретседатели Фросина Ташевска Ременски, Оливер Спасовски, Петре Шилегов, Благој Бочварски, Дамјан Манчевски и Мухамед Зекири.

-Ако тргнавме од своите редови да се исправиме, со наше коригирање и подобрување, верувајте нема да дозволиме на било кој во државата без разлика дали тоа е во јавната администрација, централна, локалната, а прима пари од граѓаните, да не ги исполни нивните очекувања, изјави тогаш Заев. 

притисни ентер