Собир „Македонија против насилство врз животните“

Под мотото „Македонија против насилство врз животните!“ денеска на плоштад Македонија ќе се одржи јавен собир, во организација на Здружението за заштита на животните „Анима мунди“.

Преку собирот организаторите бараат активности од надлежните институции за запирање на, како што велат, масовното труење на бездомните животни и  да се забрани слободната продажба на отрови.

„Анима мунди“ соопшти дека се расфрлаат отрови на шеталишта, покрај градинки и училишта и оти се врши синхронизирано труење на бездомните животни. Потенцираат и на случаи на застрелани и обесени кучиња.

Порачуваат итно да запрат таквите активности и да се преземат мерки за истрага и приведување на сторителите, кои, укажуваат, вршат повеќе прекршоци и сериозно кривично дело, казниво со казна затвор. - Потенцираме прашање е на време кога од отровите ќе настрада човек или дете зошто за жал во Македонија отрови слободно се купуваат и масовно злоупотребуваат, а за тоа никој не одговара! Се што се случува е резултат на институционалната некомпетентност, инертност и молк, наведуваат од „Анима мунди“.

Ги повикуваат министерствата за внатрешни работи и за земјоделство, шумарство и водостопанство, Агенцијата за храна и ветеринарство и единиците на локална самоуоправа итно да постапат во рамки на сопствените надлежности и да изнајдат хумани и ефикасни начини за надминување на проблемот со бездомни животни.

Фрлањето отров на јавни површини го осудија општина Центар и Град Скопје, од каде апелираа доколку се забележи појава на труење животни да се пријави во полиција на бројот 192, или во ЈП „Комунална хигиена“ (02 321 66 44) и во стационарот „Вардариште“ (02 820 13 57).

- Фрлањето отров и отровни материи на јавни површини со цел труење бездомни животни е крајно неодговорна постапка, претставува сериозна опасност по здравјето и животот на луѓето и животните, а воедно е и кривично дело, соопшти Град Скопје.

Градските власти истакнаа дека во изминатите две години двојно се зголемени капацитетите на стационарот за бездомни животни во Вардариште, со кој стопанисува ЈП „Комунална хигиена“. Објектот, како што информираа,  е изграден според европски стандарди и во него се сместени 48 нови боксови за сместување и хуман третман на заловените кучиња скитници, за што Град Скопје потроши околу седум милиони денари.

Полската владејачка партија не успеа да обезбеди апсолутно мнозинство на изборите

Полската националистичка партија ,,Право и правда” , најверојатно со мала предност освои втор мандат по преброените 99,5 проценти од гласовите на вчера одржаните парламентарни избори.

,,Право и правда” најверојанто го загуби влијанието и врз помалку влијателниот горен дом на Парламентот ,Сенатот, изјави лидерката на опозицијата Катарина Лубнауер.

Конечните официјални резултати се очекуваат до доцна вечерва, но веројатниот пресврт за ПиС, која со своите први резултати очекуваше апсолутно мнозинство, ја одразува комплексноста на полскиот изборен систем.

Прелиминарните резултати од изборите по пребројувањето на 99,5% од гласовите покажаа дека ПИС освои 43,8% од гласовите, додека во 2015 година освои 37,6%.

Но, некои аналитичари посочија дека ова може да се претвори во помалку од 231 места потребни за мнозинство во долниот дом, Сејмот, што значи дека ќе мора да бараат коалициски партнери.

ПИС се надеваше на двотретинско мнозинство во Сејмот, за да може да го изменат Уставот.

„Сенатот се врати. Благодарение на договорот на опозициските партии, опозицијата ќе има мнозинство во Сенатот“, напиша Лубнауер на Твитер.

Доколку биде потврдено, опозицијата ќе може да го блокира или одложи усвојувањето на законот за ПИС и ќе има право да гласа за именувања во највисоките полски институции.

Либералната опозиција оствари голема победа во некои поголеми градови чии гласачи беа загрижени за судбината на демократските стандарди во земјата.

За прв пат, група екстремни десничарски политичари и активисти влегоа во парламентот, освојувајќи 6,8 проценти од гласовите.

Заев на 159-тата седница на Владата во Битола: Влогот во населението е влог во човечкиот капитал

Сакаме да бидеме уште поблиску до граѓаните и до локалната самоуправа, да ги слушнеме нивните приоритети и потреби.

Од тие причини Владата на Република Северна Македонија својата редовна 159-та седница ја одржува вечерва во зградата на Општина Битола заедно со градоначалниците од пелагонискиот регион, од општините Битола, Прилеп, Крушево, Кривогаштани, Долнени, Новаци, Могила и Демир Хисар, истакна претседателот на Владата Зоран Заев, во изјавата за медиумите непосредно пред почетокот на седницата, и додаде дека ова е прва во низата седници што во наредниот период еднаш месечно, ќе се одржуваат во различните региони во државата.

„Во текот на денот, на седницата ѝ претходеа повеќе теренски активности на министрите, замениците министри и на некои од директорите на јавните претпријатија. Денес речиси целата Влада дејствуваше од и во Битола и Пелагонија. И тука, како и во целата држава се случува градежна офанзива во патната, водоводната и канализационата инфраструктура. Во Пелагонија имаме завршена и тековна рехабилитација и на патната инфраструктура – тука е патот до Прилепското Езеро, патот Битола – Новаци, патот Битола – Демир Хисар, патот Макази – Ресен, како и железничката пруга Битола – Кременица. Сериозно напредуваме и со гасоводот Неготино-Прилеп- Битола, со процент на реализација до 70 отсто.

Во обраќањето на почетокот на седницата, премиерот Заев информираше и за инвестициите во здравството, и ги издвои реновираната итна медицинска помош, вработувањата на медицински кадар,како и инвестициите во  вложено е во реконструкции и во нови апарати.

Претседателот на Владата на Северна Македонија Заев зборуваше и за мерката за бесплатни еко инвертери за греење во домаќинствата која во првата фаза ќе ја опфати и Битола.

„До 1000 евра ваучер за секое семејство кое ќе се одлучи да се грее на клима инвертер, а во исто време ќе се откаже од загревање на тврдо или фосилно гориво што загадува. Изразувам уште еднаш благодарност за Електрани на Северна Македонија за поддршката во реализација на оваа мерка, со која влијаеме врз изворите на загадување и со која го штитиме здравјето на граѓаните“, рече премиерот Заев.

Тој додаде дека влогот во населението е влог во човечкиот капитал.

„Затоа сме посветени да оставиме градби, објекти и институции кои им служат на граѓаните. Притоа особено вложуваме и во децата. На таа тема, сакам да ги издвојам инвестициите во градинките во Кривогаштани, Кравари, Новаци, Прилеп и Ресен. И она за што сме особено среќни – трансформацијата на домот за доенчиња и мали деца во Битола во пет мали групни домови со што пред време го финализираме процесот на вадење на децата од институциите и нивно сместување во подобри услови во мали домови, со индивидуален пристап кон секое дете“, потеннцираше премиерот Заев во обраќањето на почетокот на седницата на Владата, која вечерва се одржа во Битола во присуство на градоначалниците од пелагонискиот регион, се наведува во соопштението од Владата.

Заев : Вложувањето во пелагонискиот регион ќе продолжи со уште поголем интензитет во проекти од интерес за граѓаните и младите

Премиерот Зоран Заев денеска претседаваше со 159-тата седница на Владата која што се одржа во Битола, како прва седница во низата што во наредниот период ќе се одржуваат во различните региони во државата.

На седницата присуствуваа, и во нејзината работа учествуваа и градоначалниците од пелагонискиот регион, од општините Битола, Прилеп, Крушево, Кривогаштани, Долнени, Новаци, Могила и Демир Хисар.

Во прилог на ова соопштение, ви го пренесуваме обраќањето на премиерот Заев.

Оваа иницијатива е со цел да бидеме поблиску до граѓаните и до локалната самоуправа. Да бидеме непосредно блиску до нив за да ги слушнеме нивните приоритети и потреби.

Во име на таа цел, на оваа седница, се поканети и градоначалниците од пелагонискиот регион.

Ви благодарам што сте тука вечерва со нас.

Вечерва министрите ќе реферираат за активностите на секој од ресорите во пелагонискиот регион. Знам дека има што да се реферира.

И тука, како и во целата држава се случува градежна офанзива во патната, водоводната и канализационата инфраструктура. За ова воведно излагање, ќе ги издвојам објектите за отпадни води и фекални води во Битола, како и канализационите мрежи во Долнени, Могила, Големо Коњати, Крушеани.

Во Пелагонија имаме завршена и тековна рехабилитација и на патната инфраструктура – тука е патот до Прилепското Езеро, патот Битола – Новаци, патот Битола – Демир Хисар, патот Макази – Ресен, како и железничката пруга Битола – Кременица. Сериозно напредуваме и со гасоводот Неготино-Прилеп- Битола, со процент на реализација до 70 отсто.

Тука во Битола имаме и сериозни инвестиции во здравството – реновирана е итната медицинска помош, реализирани се повеќе вработувања на медицински кадар, вложено е во реконструкции и во нови апарати. И се разбира, и тука во Пелагонија лековите се достапни во секое населено место, за секој граѓанин, во секој ден од месецот, преку мерката за укинување на квотите за лекови.

Кога сме кај здравјето на граѓаните – токму Битола е еден од четирите големи градови за чие население стојат на располагање бесплатни еко инвертери за греење во домаќинствата. До 1000 евра ваучер за секое семејство кое ќе се одлучи да се грее на клима инвертер, а во исто време ќе се откаже од загревање на тврдо или фосилно гориво што загадува. Изразувам уште еднаш благодарност за Електрани на Северна Македонија за поддршката во реализација на оваа мерка, со која влијаеме врз изворите на загадување и со која го штитиме здравјето на граѓаните.

Влогот во населението е влог во човечкиот капитал, почитувани министри и градоначалници. Затоа сме посветени да оставиме градби, објекти и институции кои им служат на граѓаните. Притоа особено вложуваме и во децата. На таа тема, сакам да ги издвојам инвестициите во градинките во Кривогаштани, Кравари, Новаци, Прилеп и Ресен. И она за што сме особено среќни – трансформацијата на домот за доенчиња и мали деца во Битола во пет мали групни домови со што пред време го финализираме процесот на вадење на децата од институциите и нивно сместување во подобри услови во мали домови, со индивидуален пристап кон секое дете.

Сакам да им се заблагодарам на граѓаните на Битола и на Пелагонија за соработката во сите проекти кои тука се реализираат и да најавам дека вложувањето во овој регион ќе продолжи со уште поголем интензитет – ќе направиме се што е потребно граѓаните и младите да ја видат својата шанса во своето место, да имаат мотивација за ангажман, преку соодветно работно место и достоинствена плата.

Им благодарам и на министрите и на градоначалниците за нивните секојдневни напори и за проектите кои заеднички ги реализираме во Пелагонија, се наведува во соопштението од Владата.

притисни ентер