Пратката - бомба во ММФ стигнала од Грција

Портпаролот на грчката опозициска партија Неа димократија фигурира како испраќач на пратката што вчера експлодираше во канцелариите на ММФ во Париз – потврди грчкиот министер за цивилна заштита.
Оттука се поверојатно е дека грчката анархистичко –терористичка организација која ја презеде одговорноста за испратената иста ваква пратка до Шојбле, да стои и зад онаа до ММФ.

До германскиот министер за финансии како испраќач беше потпишан потпретседателот на Неа димократија, а до канцелариите на меѓународниот монетарен фонд, портпаролот на истата партија.

Министерот за цивилна заштита на Грција, говорејќи за грчките медиуми не ја отфрли целосно можноста да има и други вакви пратки, но смируваше дека веројатно се само овие две што и се веќе познати на јавноста, додека пак вели дека пратките не содржеле голема количина на експлозивен материјал. 

- Конкретните пратки секако дека можеа да направат нешто лошо, и го сторија тоа во случајот со Франција. Всушност тоа беа механизми со барут, нешто како петарда, како пиротехнички материјал, го кажувам вака, за да може народот да сфати. Имаа за цел да предизвикаат последици во комуникацијата, тоа беа симболични постапки, кои секако се за осудување - изјави Никос Тоскас – министер за цивилна заштита на Грција (преземено од ТВ Стар).

Експлозивен механизам со 31 грам барут, детонатор, батерија, кабел и штипка содржеле пратките и до Шојбле и до ММФ според грчките медиуми. Останува енигма, како овие пратки ја поминале рендгенската контрола на атинскиот аеродром и од Грција стигнале до Париз и Берлин.

Под лупата на секторот за борба со тероризам на грчката полиција е Заговор на огнените јадра, организацијата која ја презеде одговорноста за пратката до Шојбле, но и која во ноември 2010та испрати дури 14 пратки со експлозивен материјал, а се поверојатно е дека и сега го прави истото. 

Сопружници физички нападнати од нивен роднина

Скопјанецот Н.Ј. (38) и неговата сопруга Т.Ј. (33) синоќа биле физички нападнати од нивниот роднина Д.А. (31).

МВР информира дека случајот половина час по полноќ во полиција го пријавил Н.Ј., кој рекол дека од 14 часот со неговата бремена сопруга и двете малолетни деца биле на гости кај Д.А. 

Околу 21 часот, Д.А. со палка почнал да го удира Н.Ј. и неговата бремена сопруга. Со возило на Итна медицинска помош, тие биле префрлени во Ургентен центар при комплексот клиники „Мајка Тереза“, каде што им била укажана лекарска помош и им биле констатирани тешки телесни повреди. Се преземаат мерки за расчистување на случајот. /МИА

Повеќе од 42 илјади Косовци се откажале од своето државјанство во последните девет години

Од 2009  до почетокот на 2018 година, над 42 илјади граѓани на Косово се откажале од државјанството, додека само во првите четири месеци од оваа година истото го сторилe 1 648 Косовци.

Загрижувачки е бројот на младите, на возраст од 18 до 34 години, кои се откажуваат од косовското државјанство, пишува денешен „Зери“.

Заменик- министерот за внатрешни работи Изми Зека вели за весникот дека на почетокот на годинава е видно зголемен бројот на оние што се откажале од државјанството, споредено со минатата година.

– Главната причина за откажување од косовското државјанство е добивањето државјанство во некои од земјите на Европската унија, кои не дозволуваат двојно државјанство за оние кои не се државјани на ЕУ, вели Зека.

„Девојката со жиците“ на „Подвижен музички театар“-Битола вечер премиерно на Драма фестивал во Љубљана

Во словенечкиот главен град Љубљана, вечер во рамки на 5. меѓународен Драма фестивал, премиерно ќе биде изведена драмската опера „Девојката со жиците“, на „Подвижен музички театар“ –Битола (Moving Music Theatre-Bitola).

Станува збор за копродукциски проект на Словенечкиот националниот театар, СНГ-Љубљана и „Подвижен музички театар“, ММТ-Битола, во режија на битолчанецот Марјан Неќак, кој во проектот соработува со текстописецот Ана Бунтеска, Дарја Доминуш-преведувач и драматург, Наташа Филиповиќ костимограф, како и со фотографот Петер Ухар.

- Се работи за драмска опера за една виолинистка, која патува со воз низ Европа трагајќи по подобро утре. Метафоричниот и драматичен музички резултат лесно се движи низ повеќе жанрови од рок, поп, електронска музика со длабоки чувства на циркуски звук до опера како кулминирачка точка на емоции и интерпретации на двајца соло изведувачи. Во драмската опера, чија подготовка ја помогна „Еуростандард“-Скопје, ќе настапат Барбара Церар и Урош Фурст, а кореограф е Жиган Крајчар, изјави за МИА, режисерот и композитор Марјан Неќак.

Драма операта „Девојката со жиците“ на „Подвижен театар“-Битола ќе биде изведена и во наредните два дена во Љубљана. /МИА

притисни ентер