„Говорна мана“ - премиера на Македонскиот народен театар

Македонскиот народен театар задутре, 15 март, на малата сцена премиерно ќе ја постави претставата „Говорна мана“ во режија на Драгана Милошевски-Попова, според текст на познатиот српски театарски и филмски режисер Горан Марковиќ.

Приказната се одвива во театар, во гримиорна на еден актер, првенец, на крајот на неговата кариера. Актерот и професор по глума во приказната (Мишел Радински), кого го игра Игор Џамбазов, се штити себеси затворајќи ги очите пред општествената реалност и бега во илузиите кои му ги овозможува театарот.

- Во текот на процесот размислувавме дали треба да остане да се вика „Говорна мана“ или да биде говорна и други мани затоа што се занимава со разноразни општествени теми, што се сублимирани како и во другите, пред се, филмови, но и во други текстови на Горан Марковиќ, кои влијаеле да се развијам и како човек, и како режисер. Приказната е сместена во театар и сите ликови се луѓе кои кажуваат реплики што нам ни се блиски и познати, рече режисерката Милошевски-Попова на прес-конференција.

Џамбазов, исто така, рече дека и самиот пораснал со филмовите на Марковиќ со кого наоѓа и биографски сличности - и двајцата се деца на родители-актери, и двајцата израснале во театарот.

- Затоа, се она што го напишал во „Говорна мана“ е само една брилијантна слика на она што тој го доживувал во своите детски денови во театарот. Се занимавал со проблемот на театарот и театарските луѓе, а всушност преку театарот и со целото општество, рече Џамбазов, додавајќи и дека му е задоволство да игра лик на актер особено на актер како Мишел Радински за кој, како што рече, во претставата ќе се открие што се правел во животот и каде се бил.

Наспроти неговиот е ликот на млад човек (Петар) со кариера која ветува. Него го игра Ивица Димитријевиќ, а женскиот лик (Славица) го игра Сашка Димитровска. Покрај нив, кои се ликови од текстот на Марковиќ, во претставата има ликови на уште три актерки кои ќе ги играат Арна Шијак, Ана Стојановска и Билјана Јовановска.

Тие, рече режисерката, отвораат теми и прашања за тоа каков театар денес очекуваме, сакаме и имаме потреба да видиме и да правиме.

- Тоа е еден вид коментар. Тие актерки учествуваат во целата претстава и се коментатори - некој којшто учествува, кој може да критикува и да биде критикуван, додаде Милошевски-Попова, која вторпат соработува со МНТ по постановката на комедијата „Дундо Марое“ во 2008 година.

Костимографијата и сценографијата во „Говорна мана“ се на Илина Ангеловска, а музиката ја компонираше Горан Трајковски. Првата реприза на новата премиера на МНТ ќе биде на 16-ти, а втората на 29 март. 

Сопружници физички нападнати од нивен роднина

Скопјанецот Н.Ј. (38) и неговата сопруга Т.Ј. (33) синоќа биле физички нападнати од нивниот роднина Д.А. (31).

МВР информира дека случајот половина час по полноќ во полиција го пријавил Н.Ј., кој рекол дека од 14 часот со неговата бремена сопруга и двете малолетни деца биле на гости кај Д.А. 

Околу 21 часот, Д.А. со палка почнал да го удира Н.Ј. и неговата бремена сопруга. Со возило на Итна медицинска помош, тие биле префрлени во Ургентен центар при комплексот клиники „Мајка Тереза“, каде што им била укажана лекарска помош и им биле констатирани тешки телесни повреди. Се преземаат мерки за расчистување на случајот. /МИА

Повеќе од 42 илјади Косовци се откажале од своето државјанство во последните девет години

Од 2009  до почетокот на 2018 година, над 42 илјади граѓани на Косово се откажале од државјанството, додека само во првите четири месеци од оваа година истото го сторилe 1 648 Косовци.

Загрижувачки е бројот на младите, на возраст од 18 до 34 години, кои се откажуваат од косовското државјанство, пишува денешен „Зери“.

Заменик- министерот за внатрешни работи Изми Зека вели за весникот дека на почетокот на годинава е видно зголемен бројот на оние што се откажале од државјанството, споредено со минатата година.

– Главната причина за откажување од косовското државјанство е добивањето државјанство во некои од земјите на Европската унија, кои не дозволуваат двојно државјанство за оние кои не се државјани на ЕУ, вели Зека.

„Девојката со жиците“ на „Подвижен музички театар“-Битола вечер премиерно на Драма фестивал во Љубљана

Во словенечкиот главен град Љубљана, вечер во рамки на 5. меѓународен Драма фестивал, премиерно ќе биде изведена драмската опера „Девојката со жиците“, на „Подвижен музички театар“ –Битола (Moving Music Theatre-Bitola).

Станува збор за копродукциски проект на Словенечкиот националниот театар, СНГ-Љубљана и „Подвижен музички театар“, ММТ-Битола, во режија на битолчанецот Марјан Неќак, кој во проектот соработува со текстописецот Ана Бунтеска, Дарја Доминуш-преведувач и драматург, Наташа Филиповиќ костимограф, како и со фотографот Петер Ухар.

- Се работи за драмска опера за една виолинистка, која патува со воз низ Европа трагајќи по подобро утре. Метафоричниот и драматичен музички резултат лесно се движи низ повеќе жанрови од рок, поп, електронска музика со длабоки чувства на циркуски звук до опера како кулминирачка точка на емоции и интерпретации на двајца соло изведувачи. Во драмската опера, чија подготовка ја помогна „Еуростандард“-Скопје, ќе настапат Барбара Церар и Урош Фурст, а кореограф е Жиган Крајчар, изјави за МИА, режисерот и композитор Марјан Неќак.

Драма операта „Девојката со жиците“ на „Подвижен театар“-Битола ќе биде изведена и во наредните два дена во Љубљана. /МИА

притисни ентер