Понтификална света миса за Светицата Мајка Тереза

На плоштадот „Македонија“ во Скопје денеска во рамки на татковинската прослава „Денови на Света Мајка Тереза“ ќе се одржи понтификална света миса по повод нејзиното прогласување за Светица.
Најавено е дека светата миса ќе ја предводи специјалниот папски кардинал, сараевскиот надбискуп, кардиналот Винко Пулиќ.

На централниот настан се очекува да се обрати и претседателот на Република Македонија, Ѓорге Иванов, кој е покровител на прославата. Обраќање е најавено и на Скопскиот бискуп и апостолски егзарх Киро Стојанов.

Светата миса ќе ја следат голем број верници, претставници на Католичката црква и на другите верски заедници, домашни и странски делегации.

По повод прогласувањето на Мајка Тереза за Светица од страна на Ватикан, во текот на изминатите седум дена во Македонија се одржаа низа настани во рамки на татковинската прослава.

Во спомен куќата на Мајка Тереза во центарот на Скопје беа врачени статуетки со ликот на Светата Мајка Тереза и благодарници на хумани личности и организации кои во изминатиот период се докажале во областа на хуманизамот, помагањето и намалувањето на човековите страдања.

Македонската академија на науките и уметностите организираше свечена академија за ликот и делото на Светицата Мајка Тереза, а вчера беше отворена и изложбата „Министерството за одбрана и Армијата на Република Македонија за Света Мајка Тереза“.

Агнеза Гонџа Бојаџиу позната како Мајка Тереза на 4 септември на плоштадот „Св. Петар“ во Ватикан беше прогласена за Светица од страна на поглаварот на Римокатоличката црква, Папата Франциск.

Нејзиниот чудотворен карактер беше признат од Римокатоличката црква, а церемонијата на беатификација која беше чекор кон нејзино прогласување за Светица се одржа на плоштадот „Св. Петар“ во 2003 година. Со свечената служба раководеше тогашниот поглавар на Римокатоличката црква, Папата Јован Павле Втори, а присуствуваа над 300 илјади верници.

Мајка Тереза почина во 1997 година во Калкута, Индија. Родена е во Скопје на 26 август 1910 година како Агнес Гонџа Бојаџиу. Во 1979 година ја доби Нобеловата награда за мир за извонредно широката дејност во помагањето на бедните, болните и унесреќените во целиот свет. /МИА

Ѓурчиновски во Врховната команда на НАТО во Брисел

Началникот на генералштабот на Армијата, генерал-потполковник Васко Ѓурчиновски, во Врховната команда на НАТО во Монс, оствари состанок со генерал Генерал Маркус Кнеип, началникот на штаб на оваа највисока команда на НАТО.

На состанокот помеѓу генералите Кнеип и Ѓурчиновски е разговарано за тековните и претстојни активности на Армијата на Република Северна Македонија кои се спроведуваат во процесот на потполно интегрирање на нашата Армија во структурите на НАТО.

Помеѓу останатото, на работен состанок со дел од клучниот персонал на Врховната команда се дискутирани теми од интерес во насока на планирање на нашиот ангажман во заеднички активности што ќе произлегуваат по ратификација на нашето членство во НАТО.

Во рамки на посетата, во текот на вчерашниот ден началникот на генералштабот во Брисел учествуваше на состанокот на највисокото воено тело на Европската Унија – Воениот комитет на ЕУ на ниво на началници на генералштабови, на која се разгледуваа теми поврзани со обуката и активностите во мировните операции предводени од ЕУ, како дел од мисијата на Воениот комитет.

Генералот Ѓурчиновски претходно оствари средба и со претседавачот на Воениот комитет на НАТО, воздухопловниот маршал, Стјуарт Пич, на која се разговарало за теми поврзани со пристапувачкиот процес во НАТО, соопшти Генералштабот на Армијата. 

Поранешен француски министер за правда е обвинет за лажни вработувања во ЕУ

Поранешниот француски министер за правда, Мишел Мерсиер е денеска обвинет како дел од истрагата за фиктивни вработувања помошници во седиштето на ЕУ во Брисел на лица од неговата центристичка партија Демократско движење (МОДЕМ).

Поранешниот благајник на МоДем, колалиционен партнер на партијата „Република, Напред“ на претседателот Емануел Макрон, Мерсиер беше обвинет во средата за „вмешаност во проневера на јавни пари“, соопшти судски извор , а денеска и за лажни вработувања во Брисел.

Поранешниот 72-годишен министер е втор функционер во партијата што е обвинет за оваа афера.

Поранешниот главен финансиски директор на партијата, Александар Нардела, беше обвинет на 15 ноември за „проневера на јавни пари“ и „измама“.

Судот ќе утврди дали парламентарните асистенти добивале пари од Европскиот парламент додека извршувале други партиски должности.

Осомничени се вкупно петнаесетина лица, вклучувајќи поддржувачи на европратеници и партиски функционери.

Распитот ќе трае до 6 декември, кога претседателот на партијата Бајру, кој неколкупати работел како министер, се очекува да се појави на суд.

На почетокот на декември ќе бидат сослушани и поранешните француски министри Мариела де Сарнез, евро-пратеничка од 1999 до 2017 година и Силви Гулард, евро-пратеничка од 2009 до 2017 година и која е актуелен заменик гувернер на француската Централна банка.

Отворањето на прелиминарната истрага во јуни 2017 година доведе до оставка на Бајру на местото министер за правда, Сарнез на министер за европски прашања и Гулард како министерка за одбрана.

Пендаровски присуствуваше на средба на Стопанските комори од Македонија и Србија

Претседателот на Република Македонија, Стево Пендаровски, којшто е во официјална посета на Република Србија, денеска во Белград присуствуваше на средбата на Стопанските комори од Република Македонија и од Република Србија.

На средбата се разговараше за продлабочување на надворешно трговската размена при што беше оценето дека постои голем потенцијал за интензивирање на соработката за полесен пристап до трети пазари.

Претседателот Пендаровски истакна дека од големо значење е зајакнувањето на регионалната соработка за зголемување на економскиот развој, намалување на невработеноста, подобрување на социјалната благосостојба на граѓаните, како и зголемувањето на трговската размена и инвестициите. Воспоставувањето на заедничко гранично управување на Табановце/Прешево, како што рече претседателот Пендаровски, е одличен, прв чекор за олеснување на протокот на стоки за компаниите, а со унапредување на неговото работење ќе се забрза протокот на стоки.

Во однос на новата иницијатива за идно слободно движење на стоки и услуги, но и работна сила, како и меѓусебно признавање на професионалните квалификации, Претседателот истакна дека основна цел на оваа иницијатива треба да биде зголемување на регионалната соработка и понатамошна интеграција на државите во Европската Унија преку имплементација на европските правила и стандарди на регионално ниво. Тој изрази надеж дека сите западнобалкански држави ќе се приклучат на оваа иницијатива.

На средбата меѓу коморите се разговараше и за мерките коишто може да се преземат за понатамошно олеснување на условите за бизнисот во смисла на укинувањето на тарифните бариери, сведување на царинските мерки на минимум во регионот, елиминирање на сите барања на податоци коишто не се во согласност со меѓународните препораки и договори, како и на намалување на трошоците за обезбедување на истите и усогласување на работното време на органите во двете земји кои се надлежни за спроведување на увозно-извозните постапки.

Во таа насока, на средбата помеѓу стопанските комори од Македонија и од Србија беше констатирано дека има простор за интензивирање на соработката меѓу стопанските комори од двете земји со цел да се придонесе кон остварување на овие цели.

Претходно, претседателот на Стопанската комора на Македонија, Бранко Азески беше дел од делегацијата која го придружуваше претседателот Пендаровски на средбата со српската премиерка Брнабиќ.

притисни ентер