Ќе се вештачат остатоците од паднатиот авион

Продолжува истрагата за паднатиот авион во скопско Кожле.
Продолжува истрагата за паднатиот авион во скопско Кожле. На терен се истражители од Косово, чии државјани загинаа во авионската несреќа пред два дена. Деловите на урнатиот авион ќе бидат пренесени на локација обезбедена од основното јавно обвинителство Скопје, каде стручни лица ќе извршат неопходно вештачење. Поради обемноста на материјалот и потребите на истрагата подигањето и пренесувањето на материјалот ќе продолжи и утре- соопштуваат од Јавното обвинителство. Во институтот за судска медицина се пренесени телата на шестмината загинати во авионската несреќа. По наредба на јавен обвинител ќе биде спроведена постапка на нивна идентификација преку ДНК анализа.

Претседателот на Комитетот за истражување на воздухопловни несреќи Сотир Костов е на терен со истражителите од Косово. Местото е целосно обезбедено, во истрагата ќе помогнат и сликите што вчера беа направени со дрон.

Несреќата се случи во вторникот кога авионот побарал да слета на аеродромот „Александар Велики“ за да дополни гориво, по повикот се губи неговиот сигнал во близина кај Кожле каде се случи и несреќата. Авионот марка „Пајпер“ летал од Тревизо во Италија до Приштина . Во него загинаа шестмина, четворица Италијанци и двајца косовски државјани со италијански пасоши. Во Скопје под распит беа нивни двајца пилоти кои успешно слетале на аеродромот „Александар Велики“. 


Власта ги оцртува контурите на ветингот во правосудството

Власта ги оцртува контурите на ветингот во правосудството, судиите и обвинителите не се противат на идејата но велат овој процес мора да се спроведе внимателно и согласно меѓународните стандарди.

Постои Министерката за правда вели ветингот не би го извршувал извршната власта, туку експертска комисија.

„Ветингот не го спроведува извршната власт, туку на експертско ниво мешовита комисија, во која што во многу земји учествуваат и меѓународни претставници како гарантори на процесот. Останувам на ставот дека е многу побитно да имате чесни и професионални судии и обвинители, отколку да ги има а да не си ја вршат работата како што треба. Тие носат поголема штета, отколку што би било забележано како штета нивното отсуство во судство“, рече Дескоска.

Министерката е убедена дека чесните судии и обвинители не треба да се плашат од злоупотреби при спроведување на ветингот. Дека ветингот е потребен процес во земјава, истакнува и претседателот на ДУИ.

И судиите и обвинителите порачуваат дека не се против да се провери нивната работа, по порачуваат дека процесот мора да биде добро осмислен и да не се претвори во мешање на извршната во правосудната власт.

„Ветингот може да има и позитивни и негативни страни треба да се внимава да не преставува начин на опструкција на правдата поради недоволниот број на судии со кои би се пополниле испразнетите. Да се создадат добри услови за да може да се имплементира да се зајакнат капацитетите на академијата од каде ние регрутираме судии. Тоа се две зла со ветингот треба да се одбере помалото зло за граѓаните“, вели претседателот на Судскиот совет, Киро Здравев.

Претседателот на Советот на јавни обвинители, Ацо Колевски пак вели треба добро да се размисли дали во овој момент пред избор треба да се брза со ветинг на судии и јавни обвинители.  Смета дека ветингот треба да резултира со подобрување на состојбите во правосудстовото, а не со влошување.

Заев и Ахмети со оценка за коалицијата дека е стабилна и добра

Коалицијата СДСМ-ДУИ не е разнишана, туку различните внатрепартиски ставови се одлик на демократија – тврди премиерот Заев по изјавата на Мухамед Зекири кој нивните коалициски партнери ДУИ, ги нарече најголемо зло за Албанците.

 Потпретседателот на СДСМ не сака неговата партија ниту да коалицира со ДУИ по изборите напролет, но премиерот вели дека одлуката е во рацете на граѓаните и изборниот исход ќе биде пресуден.

„Мухамед Зекири не првпат кажува дека не сака коалиција со ДУИ, но во СДСМ има луѓе кои сакаат. Исто и во ДУИ има што не сакаат да коалицираат со СДСМ. Најсатирично е што на крајот граѓаните кажуваат со кого ќе коалицираме на изборите. Затоа велам, бројките се неприкосновени, тие ќе ја одредат идната коалиција“,вели Зоран Заев – претседател на Влада.

Дека односите меѓу двете владејaчки партии се стабилни, тврди и Али Ахмети. Предизборната коалиција за него не е опција, но по изборите ќе граделе стратегија за продолжување на соработката со Заев. Според Ахмети, Зекири не е легитимен претставник на партискиот став на СДСМ.

Предизборни коалиции помеѓу поголемите партии засега нема. Зијадин Села се обиде со Алијанса за Албанците да ги обедини БЕСА и Алтернатива кои ги повика за формирање на албански блок против ДУИ, но преговорите се се уште без успех.

Советот на јавни обвинители побараа одговорност од Русковска

СМС пораката од Обвинителството вчера беше објаснета како израз на моментално разочарување на обвинителката Русковска која го води случајот „Рекет“. 

Од Советот на јавните обвинители побараа објаснување од обвинителката Вилма Русковска за СМС пораката која ја испратила до еден од судиите кои одлучија Катица Јанева да биде пуштена во домашен притвор, а која, од страна на Апелациониот суд  беше оценета како директна закана и мешање во работата на Судот.. До Советот веќе стигнал дописот од второстепениот суд во кое се жалат на нејзиното однесувањето, но ќе чекаат да го слушнат и ставот на Русковска за потоа на седница да ги разгледаат сите околности.

“ Побаравме од обвинителката да ни достави писмена изјава или усно да не извести и откако ќе ни пристигне известувањето тогаш ќе заземеме и официјален став. “  – вели за Канал 5 првиот човек на Советот на јавните обвинители Ацо Колевски.

СМС пораката од Обвинителството вчера беше објаснета како израз на моментално разочарување на обвинителката Русковска која го води случајот „Рекет“. За ова директен коментар од Русковска нема, но од тоа што е познато е дека таа денеска го доби решението со кое Јанева замина дома.

Одлуката на Аплеција дојде две недели пред закажаното прво рочиште за овој предмет во кој од тројцата обвинети, во моментов само Боки 13 е во притворот во Шутка. Неговиот адвокат Сашо Дуковски пред два дена јавно обвини за лекарската негрижа во однос на лошата здравствена состојба на Јовановски, по што денеска од Државниот санитарен и здравствен инспекторат известија дека извршиле вонреден инспекциски надзор во ординацијата која се наоѓа во склоп на затворот во Шутка.

Од ДСЗИ информираа дека Боки 13 побарал лекарска помош уште првиот ден откако беше уапсен, а до 13 ноември бил 25 пати на преглед и од извршените проверки не констатирале неправилности во давањето на здравствени услуги.

“Упатите се давани со претходно медицинско известување до надлежниот суд за добивање на согласност за понатамошно лекување, но во дел од случаите пациентот е пратен со Итна медицинска помош до одредена здравствена установа во интерес на побрзо добивање здравствена услуга, за што постои уредна евиденција.” - информираат од ДСЗИ.

И од Клиниката за гастроентерохепатологија вчера ги демантираа тврдењата на адвокатот на Боки 13 дека не сакале да извршат преглед врз Јовановски и дека некои од лекарите се шегувале со неговата здравствена состојба.

притисни ентер