Грчките десничари денеска бираат нов лидер на Нова демократијата

Симпатизерите на грчката десничарска партија Нова демократија денес го избираат својот нов лидер.
По месеци перипетија, изборно фијаско, внатрешни скандали и несогласувања, членовите на најголемата опозициска партија денеска гласаат на вториот круг на внатрешнопартиските избори.

Трката е меѓу поранешниот претседател на парламентот и привремен лидер на партијата, Евангелос Меимаракис и екс министерот за реформи и дел од политичкото семејство Мицотакис, Кирјакос Мицотакис.

Двајцата опоненти во суштина имаат слична политичка идеологија, дека партијата треба да биде центро-десничарска и проевропски ориентирана. И обајцата остро ја одбиваат идејата за било каква соработка и коалиција со владата на СИРИЗА и Независни Грци.

Останува да се види дали во изборот ќе преовлада караманлистичкото крило, кое индиректно се знае дека го поддржува Меимаракис или идејата да се избере помлад, пореформистички насочен лидер кој сепак со себе го влече политичкиот багаж на семејството Мицотакис.

Новиот лидер се очекува да ги залечи раните кои се креираа во неколкумесечниот изборен период и одново да ги обедини сите членови и симпатизери на партијата, вртејќи нова страница и давајќи и нова насока на партијата.

Предизборните бројки му даваа предност на Меимаракис, кој по оставката на Андонис Самарас неколку месеци ја водеше Нова демократија, соочувајќи се и со предвремените септемвриски избори на кои партијата не успеа да се избори и да излезе пред СИРИЗА на Алексис Ципрас. Дали ќе победи умереноста на Меимаракис или пак волјата за свежите реформи и новиот лик на Мицотакис, ќе се знае вечерва околу полноќ штом се пребројат гласовите од цела Грција.

Мнозинството грчки медиуми ги третира овие внатрешни избори на опозициската партија речиси како парламентарни, давајќи им огромна тежина и оценувајќи ги како клучни за политичката иднина на државата.

Влада: Предложените за претседател и членови на РКЕ се избрани на јавен оглас

Регулаторна комисија за енергетика ќе добие нов претседател.

Владата го предложи Марко Бислимовски да ја предводи главната функција на ова регулаторно тело.

Бислимовски и досега работеше во комисијата како советник и во јавноста важи за професионалец во енергетската област. Од владата уверуваат дека ќе таков ќе биде и како претседател.

Освен Бислимовски, Владата како комисионери ги предлага Наташа Вељановска, Атанаско Тунески и Куштрим Рамадани, исто, досегашен член на Комисијата

Надлежностите и независноста на Регулаторна беа жестока тема на расправа при донесувањето на Законот за енергетика. Опозицијата обвинуваше дека Владата ја нарушува независноста на ова тело, а власта тврдеше дека наместо професионалци со комисијата раководат партиски кадри.

Познавачите на проблематика, оценуваат дека сепак тешка ќе биде битката за независност на РКЕ.

Прв човек на Регулаторна од 2009тата до сега беше Димитар Петров, кој често беше обвинуван поради неговата партиската припадност.

Платите на членовите на Регулаторна комисија се движат околу 1 500 евра.

Мандатот на претседателот и членовите е 5 години со право на реизбор.

Нова пречистителна станица за третман на отпадни води во Кичево

Општина Кичево доби нова пречистителна станица за третман на отпадни води изградена со европски пари.

Со тоа трајно се решава проблемот со отпадните води во општината и се подигнуваат стандардите за заштита на животната средина.

Пречистителната станица е со инсталиран капацитет за 48.000 жители.

Реализацијата на проектот вклучува и изградба на колектор и пристапен пат. Вкупната вредност изнесува 8,3 милиони евра.

притисни ентер