Само во Вевчани: Американка свири зурла, Јапонец игра оро

Американка свири зурла, Јапонец игра оро, а Норвежани, Швајцарци, Холанѓани и Полјаци пеат македонски народни песни. Оваа необична, колоритна група е реална и ја има во Вевчани.
Дваесет и седум влубеници во македонскиот фолклор од девет земји во светот за вековната традиција учат од  инструкторите  од ансамбалот Танец.

- Ние сме светски признаени. Во  која земја да се појавиме нашата традиција тоа е исконот. Нема бегање од тоа а странците знаат да го ценат  тоа, вели Љупчо Манески од ансамбалот Танец.

Брачниот пар Роберт и Дорис од Америка се уникатни. Тој свири на тапан а таа е единствената жена во светот која знае да свири  зурла.

- Доаѓаме овде повеќе од десет години. Многу ни се допаѓа, музиката е прекрасна. Некои ора се потешки некои полесни, но имаме прекрасни учители - вели Роберт Вингфи од Калифорнија.

- Во нашиот град ние имаме група. Три жени со  зурли и три тапани. Навистина се забавуваме. На сите им се допаѓа кога свириме,  вели Дорис од Калифорнија.

Пеат, свират и играат  од душа, како да се Македонци, родени со нашата традиција. Она што кај нас го учат го пренесуваат во своите земји.

- Го сакам македонското оро бидејќи е различно сосема поинакво  од кај нас, вели Масуро Унанај од Јапонија.

- Јас танцувам 25 години во Канада и седум години доаѓам во Македонија. Исто така свирам хармоника и пеам фолклорни песни. Тоа е магија, вели Еленор Илстен од Канада.

- Доаѓам од Полска и многу ми се допаѓа музиката и асиметричниот ритам и вашите инструменти, вели  Ана Тромбава од Полска.

Странците не пропуштаат да бидат дел од фолклорната незаборавна  магија  на овој  семинар, кој четири години по ред се одржува во преубавото Вевчани.

Ѓукановиќ ја положи претседателската заклетва

Во црногорската престолнина Цетиње со положување на заклетвата  избраниот претседател Мило Ѓукановиќ  официјално ја презема должноста.

Ѓукановиќ претседателската заклетва ја даде пред пратениците од Собранието на Црна Гора.

-Се колнам  во својата чест дека должноста претседател  на Црна Гора ќе ја извршувам совесно и одговорно за доброто на сите граѓани, рече  Ѓукановиќ во заклетвата.

Покрај пратениците , на свечената седница присуствуваа и поранешните претседатели на Црна Гора, премиери и претседатели на парламентот, како и највисоките државни функционери и челници на државните институции.  

Абас повторно примен во болница

Претседателот на Палестина 83- годишниот Махмуд Абас е примен во болница, според анонимен официјален претставник, Абас имал температура.

Палестинскиот претседател Махмуд Абас денеска повторно е примен во болница. Ова е третпат во една недела да биде хоспитализиран.

Абас во вторникот имал операција на увото и по неколку часа бил пуштен дома. Вчера повторно беше на кратко во болница.

Резултатите од анализите, како што јави палестинската новинска агенција, пренесувајќи ја изјавата на директорот на болницата, се добри.

Абас има проблеми со срцето, а пред десет години му е дијагностициран рак на простата. Инаку, тој е страстен пушач.

Дамаск ослободен, екстремистите евакуирани

Група екстремисти од Исламската држава се евакуирани од последната енклава под контрола на бунтовниците во близина на Дамаск, со што оваа територија е вратена под контрола на државата.

Сириската Опсерваторија за човекови права со седиште во Лондон, соопшти дека автобусите влегле во енклавата по полноќ за да ги превезат борците на ИД и нивните семејства.

Според Ројтерс, автобусите се упатиле во правец на провинцијата Бадија во Сирија, подрачје со мал број на жители , кое се наоѓа источно од престолнината Дамаск.

притисни ентер