Во посланието од господин господин Стефан и Светиот синод на МПЦ уште од верниците се бара да внимаваат на културната, верската и на други видови на експанзија кои доаѓаат од надвор.
Празникот на Христовото раѓање е мајка на сите празници и темел врз кој е изградено христијанското празнување. Без Божик немаше да има ни Велигден, ни Духовден, порача архиепископот г.г. Стефан преку божикното послание, кое беше прочитано пред верниците кои дојдоа да ја следат Златоусовата литургија во Соборниот храм во Скопје.
Во ова божиќно послание акцентот е ставен на начинот и на суштината на празнувањето. Наместо со земни задоволства, забави и патувања, да се празнува во црквите со богослужба порачаа од Синодот на МПЦ.
- Денес, пак, многумина меѓу нас, во деновите кога црковни настани празнуваме и на државно ниво, заминуваат на најразлични места, заборавајќи дека празникот е за празнување со богослужби, духовни содржини и посети на свети места. Со тоа, пред сè, најнапред се понижува и омаловажува благочестивата христијанска традиција, а на нејзино место се воведуваат обичаи и начини на прославување на таканареченото модерно време – се вели во посланието што го прочита отецот Драги Костадинов.
Времето во кое живееме има предности но, и предизвици и искушенија. Затоа, пораката од архиепископот и на Синодот е децата од мали да се учат на христијанските вредности.
Особено треба да внимаваме и на најновата туѓа културна, историска, економска и духовна експанзија, која во вид на најразлични содржини постојано го окупира нашето секојдневие, сакајќи да врати нешто од минатото, да нè научи на други навики, верувања и особини.
Слободата на изборот, во секоја смисла, треба да се почитува. Но православниот христијанин се покажува и потврдува не само со името, туку со верата и делата на православното живеење.
Граѓаните утрово се молеа за здравје, љубов и бериќет, а попладнево со семејствата во добро расположение ќе го прослават Божик.
Верниците кои постеле, денеска се причестија.