Култура

Обновен конакот во манастирот Свети Архангели Михаил и гаврил во Кучевиште

Конзерваторскиот центар - Скопје го обнови конакот на манастирот „Св. Архангели Михаил и Гаврил“ во село Кучевиште на Скопска Црна Гора, со грант од скоро 100.000 долари обезбедени од Американската фонд за културна заштита.

Конакот, изграден во 17 век, беше конзервиран и реставриран една година, а денеска завршувањето на проектот беше одбележан во присуство на амбасадорот на САД Пол Волерс, заменик-министерот за култура Драган Недељковиќ, архиепископот г.г. Стефан и директорката на Конзервторскиот центар-Скопје Ема Петрова.

Амбасадорот Волерс истакна дека како и за минатите проекти завршени со средства од овој фонд, чувствува големо задоволство зашто, како што рече, знае дека е зачувана уникатната и извонредна историја на Македонија.

- Манастирот сега има нов простор за пречек на посетители. Конакот е целосно реновиран, од подови до покрив, при што точно е запазен оригиналниот дизајн за да им се овозможи на идните посетители да се вратат назад во времето и да видат како изгледал конакот во 17 век.

Културните локалитети не потсетуваат на придонесите и историските искуства на нашите предци. Соединетите Држави сакаат да покажуваат почит кон другите култури и еден начин тоа да се направи е да се преземе водечка улога во напорите за заштита на културното наследство, рече американскиот амбасадор.

Заменик-министерот Недељковиќ истакна дека конакот е значаен примерок на традиционалната македонска архитектура.

- Возобновувањето на оваа градба со непроценлива вредност и враќање на нејзиниот сјај од минатото е голем чекор во зачувувањето на ова вредно наследство, голем чекор за негова соодветна презентација пред посетителите. Од денеска секој граѓанин на нашата држава или гостин од странство ќе може да го посети манастирскиот конак кој плени со својата уникатност и убавина, со својата вонвременост и возвишеност, истакна Недељковиќ. Тој посочи и дека Американската амбасада во континуитет е голем поддржувач и пријател на Македонија.

Архиепископот г.г. Стефан се заблагодари за американската помош и добра волја и за заложбите на Министерството за култура и на Градскиот конзерваторски центар. Тие интервенирале по барањето на старешинката на манастирот Марија која скоро 50 години живее таму и известила дека конакот е во незавидна состојба.

- Од името на Македонската православна црква и Скопската епархија, особено од името на мајка Марија и на сите претходни жители на манастирот, да ви заблагодарам на сите кои на свој начин помогнавте да се зачува делото во кое генерациите пред нас вградиле и многу вера, и многу љубов, и многу надеж, и за себе и за генерациите по нив, а се за слава на бога и на неговите светии, рече поглаварот на МПЦ.

Договорот за грант од 98.900 американски долари за обнова на конакот беше потпишан во септември минатата година меѓу Амбасадата на САД и Министерството за култура. Во изминатите 12 години овој споменик на културата е меѓу 11-те во Македонија кои се обновени од фондот и кои вкупно добиле повеќе од еден милион долари.

Обновениот конак е изграден во средината на 17 век. Има приземје и кат со простран чардак. Во конакот има фурна и огниште, а низ приземните одаи тече поток. Има уште еден конак, на јужната страна, изграден во 19 век. Манастирската црква посветена на архангелите Михаил и Гаврил датира од 14 век. Изградена е во периодот меѓу Маричката (1371) и Косовската битка (1389). Градена е по примерот на црквите на Света Гора.

Живописана е во 1591, под ктиторство на свештеникот Никола кој ги ангажирал сликарите. Во тоа време е направен и иконостасот, од кој е зачуван само крстот. Сегашниот иконостас и иконите се од средината на 19 век. Црквата и иконостасот се реставрирани во 1991/1992 година. /МИА/

Свет

Убила 19-годишна трудница и ѝ го украла бебето од матката-осудена е на 50 години затвор (ВИДЕО)

Клариса Фигуероа (51) е осудена на половина век затвор откако убила бремена тинејџерка во Чикаго намамувајќи ја во нејзината куќа за да ѝ го украде бебето од утробата, кое потоа го претставила како свое.

Тоа е, накратко, епилогот од страшното злосторство што го потресе овој дел на САД, а се случи во 2019 година, објави Еј-Би-Си Њуз.

Марлин Очоа-Лопез (19), мајка на двегодишно момче, која била во поодмината бременост, била намамена од Клариса во нејзиниот дом со ветување дека ќе ѝ даде бесплатна облека за бебето. Страшното злосторство го извршила со помош на нејзината ќерка Дезире, која во јануари ја признала вмешаноста во убиството кога била осудена на 30 години затвор. Мајката и ќерката ја задавиле трудница со електричен кабел. Клариса, која е медицински работник, сакала да го претстави бебето како свое, а откако го извлекла од стомакот на мајката повикала брза помош. Поради повредите, бебето два месеци било на интензивна нега во болница, но и покрај сите напори на лекарите, починало.

За време на судењето, се тврдело дека Клариса Фигуероа го изгубила своето бебе пред злосторството, а потоа им кажала на членовите на семејството дека повторно е бремена. Во октомври 2018 година, таа ѝ кажала на својата ќерка дека ѝ треба помош да убие трудница и да го украде бебето од нејзината утроба.

Ракел Уриостеки, мајката на убиената трудница, по изрекувањето на пресудата видно се потресе:

- Губењето на ќерка ми е нешто што никогаш нема да го прежалам.

Откако украденото бебе било сместено во болница, Клариса Фигуероа и нејзиниот партнер Пјотр Бобак тврделе дека бебето е нивно, па дури започнале и хуманитарна кампања за собирање помош за негово лекување. Пјотр подоцна на судењето признал дека помогнал да се отстранат трагите по убиството на бремената тинејџерка.

Страшното злосторство било неоткриено неколку недели, иако Џовани Лопез, сопругот на убиената, уредно ја пријавил за исчезната, но немал помош од надлежните да ја пронајдат. Полицијата реагирала дури по анонимна пријава во која било наведено дека е видена како исчезнатата влегува во куќата на Клариса Фигуероа. На 07.05.2019 година полицијата извршила претрес. Автомобилот на жртвата бил пронајден во близина на куќата на убиецот, а набрзо била наредена и ДНК анализа на бебето. Откако дошле резултатите од ДНК, полицијата ги уапсила мајката убиец, нејзината ќерка и нејзиното момче. Телото на жртвата било пронајдено закопано во дворот.

- Казната што ја доби никогаш нема да биде доволна и мојот син никогаш повеќе нема да ја прегрне мајка си. Изгубив дел од семејството и тоа секогаш ќе ме следи – низ солзи изјавил сопругот Џовани Лопез.

Живот

Нуркачи снимија како изгледа силен земјотрес под вода: Сега имам уште еден страв (ВИДЕО)

Страшно искуство е да се почувствува силен земјотрес, а група нуркачи го доживеале под вода додека јачината била 7,2 степени според Рихтеровата скала.

Видеото се рашири на социјалните мрежи, а корисниците пишуваат дека откако го погледнале, се наежиле и откриле нов страв.

На видеото се гледаат неколку нуркачи како пливаат меѓу коралниот гребен и уживаат во живописната глетка. Но, сè се менува кога ќе започне земјотресот. Прашина и нечистотија од морското дно се креваат и изгледаат како морничава магла.

So this is what an earthquake looks like underwater
byu/Literally_black1984 ininterestingasfuck

Се гледаат и нуркачи како се држат до коралите додека водата се движи побрзо и побрзо. „Да, мора да е кошмар“, „Изгледа страшно“, „Морничаво“, се само дел од коментарите.

Свет

Ужас во Англија: 80- годишен човек е запален во двор, соседите слушнале крици (ВИДЕО)

Две лица се уапсени откако полицијата пронашла изгорено тело на маж во задната градина на домот на едно „многу повлечено“ семејство, како што ги опишале соседите во Бредфорд.

Соседите во тивка уличка во Бредфорд пријавиле дека слушнале врисоци пред да видат како чад се издига зад куќата. Според извештаите, жртвата била 80-годишен маж кој живеел во куќата со помлада жена и нејзиниот син, објави Сан.

Многумина во соседството биле убедени дека човекот починал, затоа што не го виделе од пандемијата на коронавирус.

„Од градината доаѓаше чад, но не можевме да влеземе бидејќи портата беше затворена. Се обидовме насилно да ја отвориме портата и можевме да видиме крв и осакатено тело. Не можев да верувам, беше како нешто од хорор филм“, рекол соседот Мухамед.

„Семејството буквално никогаш не излегуваше надвор, тие се многу повлечени. Ова се случи целосно од ведро небо и сите се многу шокирани од тоа“, рече друг сосед кој сакал да остане анонимен.

Полицијата денеска соопшти дека го идентификувала телото на возрасен маж, но дека се уште се обидуваат официјално да го идентификуваат мажот и да им влезат во трага на неговите најблиски.

„Според информациите достапни во овој момент, ова го третираме како истрага за убиство. Мојот тим работи на утврдување на околностите кои довеле до смртта на човекот. Имаме две лица во притвор и не бараме никој друг во врска со овој инцидент, што се случи во тивка станбена улица, разбирам дека овој инцидент предизвика загриженост во пошироката заедница и има многу шпекулации за тоа што се случило и кој бил инволвиран.“

На местото на настанот се испратени пожарникарски екипи, полиција и брза помош, а соседите велат дека досега не виделе толку големо присуство на итните служби.

Противпожарната и спасувачка служба во Западен Јоркшир соопштија дека екипите го изгаснале пожарот на имотот.