Македонија

Математика ќе биде задолжителен предмет на државната матура

Математиката ќе биде трет задолжителен екстерен предмет на државната матура од 2014/2015 за гимназијалците, а од 2015/2016 за матурантите во средното стручно образование. Изземени се учениците од средните уметнички училишта, зашто тие не го изучуваат тој предмет.

Реформата ќе се спроведува етапно во наредните три години. Преодот од два во три екстерни предмети ќе почне од генерацијата која ќе матурира оваа учебна година. Тие ќе полагаат државна матура по т.н. модел 1+2 - покрај двата предмета - мајчин јазик и странски или математика, гимназијалците и матурантите од стручните школи ќе имаат уште еден екстерен предмет по избор од предметите што ги изучувале. Наместо два, ќе имаат еден интерен предмет и проектна задача, како и досега.

Третиот екстерен предмет, кој за годинашните матуранти ќе биде по избор, од идната година ќе биде задолжително математика за гимназијалците, а по две години и за матурантите од средните стручни училишта. За уметничките, остануваат мајчин јазик и странски или естетика/филозофија, а ќе се воведе историја.

Новина е и тоа што екстерните предмети од државната матура во јуни ќе се полагаат електронски, освен есејот во мајчин и во странски јазик или текстуалните задачи во математика. Интерниот испит и натаму ќе се полага писмено.

Новините денеска ги соопшти министерот за образование и наука Спиро Ристовски, кој смета дека на овој начин ќе се зголеми објективноста во оценувањето и ќе се обезбеди поправедна и поквалитетна селекција на кандидатите за упис на факултет.

- Цениме дека е неопходно математиката да биде задолжителен предмет, затоа што тоа е материја малку видлива, но многу практична и ефективна во секојдневниот живот. Особено значајна за младите кои се определуваат за техничките струки... Во сите меѓународни пракси и истражувања јасно е покажано дека земјите кои силно се фокусирани на математиката во кој било сегмент од образованието, имаат многу поквалитетни резултати, истакна Ристовски на прес-конференција.

Средните стручни училишта имаат најдолг период за адаптација. Таму матурата можеби ќе се полага на двапати - прво математика, по завршување на втора година, а на крајот од четврта и останатите предмети од матурата.

Покрај државна матура, годинашните матуранти ќе полагаат и екстерно тестирање, што е обврска за сите ученици во образованието. Тестирањето е реформа воведена лани, кога беа исклучени матурантите. Ристовски рече дека се уште се дефинира кога ќе биде тестирањето за нив. За да имаат време меѓу двата испита, екстерното тестирање веројатно ќе биде на крајот на првото или на почетокот на второто полугодие.

Роковите за државната матура засега остануваат непроменети, полагањата ќе бидат во јуни, односно во август за тие што нема да ја положат или не во целост. /МИА/

Регион

За една недела во Грција се уапсени 379 лица за семејно насилство

Минатата седмица грчката полиција уапсила 379 лица по поднесени пријави за семејно насилство, а 23 жртви биле пренесени во центрите за згрижување, јави дописничката на МИА од Атина.

Министерството за заштита на граѓаните на Грција информираше за резултатите од спроведувањето на новиот план на полицијата за справување со криминал, семејно насилство и врсничко насилство.

Согласно неделниот извештај, во периодот од 15 до 21 април, полицијата примила 1.025 повици за семејно насилство, а на 81 жена – жртва на насилство ѝ била инсталирана специјалната апликација за помош „Panic Button“ на грчката полиција .

Биле пријавени 633 случаи на семејно насилство, при што биле уапсени 379 лица, а 23 жртви на насилство биле пренесени на безбедни локации.

Во однос на малолетничката деликвенција и врсничкото насилство биле извршени проверки на 6.004 лица, од нив 344 биле приведени, а 160 уапсени и биле потврдени 270 прекршоци.

Македонија

Како на младите да им се врати љубовта кон книгата?

Некогашната парола, книгата е прозорец кон светот, за младите повеќе не важи. 

За нив прозорец кон светот е интернетот, книги читаат само понекогаш, ако тоа од нив го побараат наставниците.

Дека е така потврдуваат и дел од издавачите на овогодинешниот саем на книга.

Најмалку читаат средношколците, и основците, а книги купуваат најчесто кога се на попуст. Слободното време, најчесто го поминуваат на интернет. За разлика од нив, за повозрасните, технологијата не е предизвик.

36 издание на Саемот на книга завршува утревечер, во 20 часот.

Македонија

Од петок постепена стабилизација на времето

Невообичаено топлите времелетни температури нагло се заменија со ладни и дождливи денови.

Во наредните 2 дена ќе владеат врнежи, на некои места ќе бидат поројни, а планинските предели ќе добијат уште една мала снежна покривка, предупредуваат од УХМР. Оние кои планирале прошетка претсојниот викенд не треба да се грижат, тмурните облаци ќе се расчистат, а вистинската пролет, со умерени температури веќе при крајот на неделата ќе пристигне во Македонија.

-Веќе од петок ќе имаме постепено стабилизирање на временската состојба, ќе преовладува во петок претежно стабилно, веќе и потопло време, а од деновите од викендот со максимални температури кои ќе бидат во интервал од 18 па се до 26 степени.-УХМР

Сепак ваквото време во претстојните два дена го вклучи и алармот кај ЦУК. Од таму ги предупредуваат граѓаните да внимаваат на магистранлните и регионални патишта поради одрони од карпи, како и на прилагодување на брзината поради мокри патишта. Воедно, граѓаните да избегнуваат суводолици порадо можност од нагло надоаѓање на вода, а и одводните канали треба да бидат чисти и проточни, наместо да се создаваат брани од ѓубре...

-Истовремено да се внимава на работите што можат буквално, како велиме, да одлетаат од градбите во населбите и особено што се од градбите во изградба, градилиштата, треба да се обезбедат практично сите работи што заради ветер би паднале и би претставувале опасност за луѓето кои што се во околината. Ако се престојува на планина пак препорачливо е да се има доволно гориво во возилата и да се внимава на планинските патишта, конкретно на лизгавостаи на проодноста на патот особено ако не е асфалт. – Илија Бојаровски – ЦУК

Според хидролозите, не постои закана и опасност од излевање кај поголемите реки и сливови, но и тие упатуваат на внимателност кај суводолиците и помалите сливови, како и кај атмосферските канализации кои се во опасност од запушување. Сепак, уверуваат, дека дождливото време во овој период е повеќе од добредојдено.

притисни ентер