Веднаш реагираше Москва, која тврди дека се работи за фабрикувани податоци, исти онакви со какви што се служел Буш во ирачката војна. Аналитичарите очекуваат се да биде појасно по по средбата Обама – Путин на претстојниот самит Г-8.


Ја премина ли сирискиот претседател границата на некогашниот сојузник Америка? Ако се слуша Вашингтон – да, додека Москва тврди – ова е уште еден обид со фабрикувани информации да се влезе во нова војна, додека истовремено се излегува од две слични такви. Играта каде што правилата допрва ќе се воспоставуваат, ја започна Конгресот, каде клучни докази се снимки од болница во Алепо во која починале меѓу 100 и 150 луѓе како последица на нервниот отров сарин.
- Се надевам дека претседателот ќе одлучи да им даде оружје ан овие луѓе, за да се бранат себе си, додека руско и иранско оружје влегува неконтролирано во земјата на страната на Башар Асад. Пријатели, ова не е фер борба, изјави сенаторот Џон Мек Кејн, инаку републиканец.
Веста доби начање откако Белата куќа преку заменик советникот за национална безбедност Бен Роудс објави дека сирискиот режим ја минал црвената граница, што Обама јавно ја постави минатата година.
- Црваната линија за нас е хемиското оружје, неговото размесување или употреба. Тоа би ги променило моите планови, изјави минатата година Обама.

Паралелно со информацијата дека Вашингтон одлучил да ја засили воената поддршка за бунтовниците, Белата куќа го испрати и досието за Асад во Москва. А за тоа како Москва ја сфати пораката, говори и фактот што реакцијата стаса преку Твитер, од првиот човек на комисијата за надворешна политика на Думата, Алексеј Пушков.

- Информацијата е фабрикувана од истото место од каде што излегоа и лагите за оружјето за масовно уништување на Хусеин. Обама тргна по патот на Буш, напиша Пушков.

Во целата ситуација каде е нејсно зошто се се случува сега, две години од почетокот ан крвопролевањата, единствено аналитичарите го поставија вистинското прашање: Која е целта? Зашто, ако треба да се присили Асад да седне на преговарачка маса, тоа ќе биде тешка, долготрајна и макотрпна работа, поради поддршката од Иран и Хезболах. Доколку, пак, треба да им се помогне на бунтовниците да остварат воена победа, тоа значи дека огромно количество оружје би се слеало во Сирија, што ќе го регионализира конфликтот и ќе го зголеми бројот на жртвите, кој според ОН досега е над 93 илјади.