Џафери: Косовските безбедносни сили на обука во Македонија

Македонија и Косово ќе соработуваат во безбедносната област, додека Џафери ветува дека на сите воени и одбранбени средби и состаноци Македонија ќе се заложи и косовските безбедносни сили да имаат свои претставници.



Талат Џафери за првпат како министер за одбрана го посети Косово. Се сретна со домаќинот , косовскиот министер за безбедносни сили Агим Чеку. И двајцата се надеваат дека Косово наскоро ќе има армија и министерство за одбрана според планот на Ахтисари, но тоа ќе зависи и од преговорите меѓу Белград и Приштина. А дотогаш Македонија и Косово ќе соработуваат во безбедносната област, додека Џафери ветува дека на сите воени и одбранбени средби и состаноци Македонија ќе се  заложи и косовските безбедносни сили да имаат свои претставници.

Чеку ја истакна добрата соработка на одбранбените институции, како и понудените воени капацитети во Македојнија за обука и образование на припадници на косовските безбедносни сили.

-Ние делиме исти цели како што се евро- интеграциите, добрососедските односи за мир и безбедност во регионот, стратегиските односи со САД. Еден од основните столбови на градењето на одбранбената политика е градење на добрососедски односи како начин за подобрување на регионалниот мир и соработка, рече Агим Чеку, министер на косовските безбедносни сили.

Ниту косовските новинари не го поштедија Талат Џафери од прашање за протестите против негово назначување за македонски министер за одбрана, а тој кратко одговори дека тоа прашање во Македонија веќе е апсолвирано. Џафери се сретна и со претседателот на косовскиот Парламент Јакуп Красниќи. Но неочекувано наспроти досегашната практика на македонските министри за одбрана, Џафери во агендата ја вметна и посетата на меморијалниот дом на загинатиот припадник на ОВК Адем Јашари во селото Преказ. На крај министерот Џафери се сретна со командантот на КФОР, генерал мајор Волкер Халбауер.

Додека судбината на Косово се решава во Брисел на средбите меѓу Дачиќ и Тачи, во Приштина владее исчекување на конечното решение. Можеби и поради тоа изостанаа и коментари за безбедносната состојба во регионот за време на посетата на министерот Џафери на Косово. Од Приштина Миомир Серафиновиќ, Канал 5 ТВ.
притисни ентер