Според истражувањето спроведено во април, 62 проценти од испитаниците не се подготвени да се вакцинираат со Спутник V, развиен од научниот институт Гамалеја. Тоа е главната вакцина за имунизација на населението.
Толкав процент на луѓе имале отпор кон вакцинацијата и во февруари, но опаднал бројот на оние кои сакаат да се вакцинираат. Во февруари 30 проценти биле за вакцинација, а во април 26 проценти.
10 проценти од нив се изјасниле дека веќе ја примиле вакцината.
Во исто време, 56 проценти од Русите не се плашат од зараза со коронавирус, исто како и во февруари, но многу повеќе отколку во декември минатата година, кога 41 процент изјавиле дека не стравуваат од ковид-19.
Кампањата за вакцинација во Русија затоа заостанува, иако тоа беше првата земја во светот што ја одобри вакцината против ковид-19.Русија го одобри Спутник V за употреба во август 2020 година.
Досега, двете дози на вакцината им биле дадени на 10 милиони луѓе, а само првата доза на 14 милиони.
Русија, која има повеќе од 146 милиони жители, досега има развиено четири вакцини, а наскоро треба да се најде на пазарот „полесната“ верзија на Спутник V во единечна доза.
Заводот за статистика Росстат објавил дека пандемијата однесе околу 250.000 животи.