Ахмети од Кичево: Идејата за премиер албанец е во интерес на еднаквоста

Претседателот на Демократската унија за интеграција Али Ахмети денеска во Кичево пред членовите и симпатизерите на партијата го претстави Насер Зибери, кандидатот што го номинираше ДУИ за прв премиер албанец.

На собирот присуствуваше и носителот на изборната листа во ИЕ број пет од редовите на ДУИ Талат Џафери, како и градоначалникот на општина Кичево Фатмир Дехари како претседател на локалниот изборен штаб на ДУИ.

Ахмети во оваа прилика упати честитка до САД за денот на независноста и посочи дека ќе продолжат со унапредување на албанците, овој пат преку идејата за прв премиер албанец на нашата земја.

-Оваа земја имала нобеловци албанци како што се Мајка Тереза и Ферди Мурати. Со нив нашата земја се гордее како што ќе се гордее и со премиерот албанец бидеќи тој ќе работи во интерес на сите кои живеат во оваа држава. Имаше противење и во времето на изборот на Дехари за градоначалник на Кичево но денеска сите увидоа дека во Кичево се живее сложно, без разлика на етникумот кому му припаѓаат. Затоа и оваа наша најнова идеја ќе биде во интерес на еднаквоста се разбира ние ќе продолжиме и во други сфери за да работиме во интерес на сите граѓани, рече меѓу другото Ахмети во Кичево.

Талат Џафери истакна дека најпрвин треба да го зачуваме нашето здравје. Тој ги повика учеснициите на собирот да ја поддржат идејата за прв премиер албанец бидеќи, како што додаде, „ние сме народ кој не го заборава минатото, и токму поради тој факт народот ќе ги поддржи нивните синови".

Според Насер Зибери оваа нивна идеја произлегла за да ги победи антагонизмите помеѓу СДСМ и ВМРО-ДПМНЕ. – Ако имаме намера да бидеме европска земја тогаш заедно рамноправно ќе се бориме за правда и рамноправност. Во една химна која не исклучува можеме ли да бидеме рамноправни, па оттука големата идеја на Али Ахмети да ги надминеме и последните бариери за рамноправност. Оваа идеја е во интерес на граѓаните па затоа ќе победиме и ќе ја реализираме, рече Зибери.

Присутните ги поздрави и градоначалникот Дехари, кој рече дека големите идеи потекнуваат од овој плоштад, од синот на овој град и дека оваа идеја ќе победи. /MИА

Сообраќајот по влажни коловози, АМСМ препорачува внимателно возење

Сообраќајот на државните патишта се одвива по наместа влажни коловози, со умерен интензитет надвор од градските средини. 

АМСМ препорачува прилагодена брзина на движење, почитување на поставената сообраќајна сигнализација и исклучително внимателно управување со возилата.

Посебно се препорачува внимателно возење низ клисурите каде има можност од појава на одрони и тоа на делниците Катланово – Велес, Маврово – Дебар – Струга, Виница – Берово и Кочани – Делчево.

Според АМСМ, на граничните премини, од македонска страна, нема подолги задржувања за влез и за излез од државата.

На регионалниот патен правец Р2431 Штип – село Аргулица – Плачковица (детско одморалиште), на делот од кракот за село Прналија, 500 метри после аеродромот кон викенд населбата (28050км.), сообраќајот е во прекин поради оштетување на патот во должина од 50 метри На местото е поставена вертикална сигнализација.

Променливо облачно, со локален дожд, грмежи и засилен ветер

Времето денеска ќе биде променливо облачно со сончеви периоди и нестабилно со локален пороен дожд, грмежи и засилен ветер. 

Минималната температура ќе се движи од 14 до 21, а максималната од 26 до 32 степена.

Во Скопје ќе биде променливо облачно со сончеви периоди и со повремен пороен дожд и грмежи. Минималната температура ќе се спушти до 18, а максималната ќе достигне 29 степени.

Од понеделник ќе преовладува сончево и потопло време, а во попладневните часови ќе има услови за изолирана појава на дожд и грмежи.

Зголемен бројот на новозаразени, вакцините против грип дел од стратегијата за справување со КОВИД-19

Нови 200 случаи на КОВИД-19, 15 оздравени и четири починати лица, е билансот што го регистрира вчера Министерството за здравство.

Според податоците, по Скопје, најголем број новозаразени има во Штип, Куманово, Гостивар, Тетово и Велес.

Министерот за здравство, Венко Филипче најави зголемување на бројот на бесплатните сезонски вакцини против грип како дел од стратегијата за справување со КОВИД-19, а рече и дека се преземаат чекори за зајакнување на болничките капацитети, за брзо тестирање, како и за зголемување на медицинскиот персонал во пресрет на евентуален нов корона бран оваа есен.

Инфективната клиника, пак, овој месец ќе биде „зајакната" со шведско искуство за нега на пациенти болни од КОВИД-19.

-Дел од нашата стратегија е двојно да ги зголемиме бесплатните сезонски вакцини против грип. Вакцината нема да биде задолжителна, но таа и тоа како е важна мерка за заштита против КОВИД-19, особено за луѓето од најранливите групи. Ќе ги вакцинираме сите лица постари од 65 години, пензионери, ќе има вакцина и за здравствените работници, за трудниците..., за тие кои сметаме дека најмногу треба да се заштитат. Верувам дека ќе има добар одзив и дека ќе прифатат вакцинација. Да се заштитат барем од сезонскиот грип, зашто за тоа има заштита-вакцина. Сега гледаме колку е вакцинацијата битна, кога се соочуваме со болест за која нема вакцина, нагласи Филипче.

Според него, продолжува изградбата на модуларни болници во 16 општини низ земјава и моментно нема недостаток на специјалисти иако лекарите веќе почнале да ги користат одморите.

-Прво ги спремаме 16-те КОВИД центри по примерот на модуларната болница до Инфективната клиника, за да се зголеми бројот на болнички кревети во сите болници ширум државата, и целосно да се одделат овие пациенти со КОВИД-19. Во секоја од овие 16 ќе има брза дијагностика, да се знае веднаш по приемот дали пациентот е носител или не на вирусот, да се знае по која патека да се движи, напомена Филипче.

Медицинскиот техничар од Шведска, Ханс Јорген Михаел Селберг кој пристигна во земјава на четврти август преку европскиот механизам за цивилна заштита, ќе им помогне на своите колеги од Инфективната клиника при нега на пациенти болни од КОВИД-19. Тој ќе престојува на Клиниката еден месец за да ги пренесе своите искуства.

На Инфективната клиника, како што покажува последната, вчерашна статистика на Министерството за здравство, примени се четири пациенти, а вкупно хоспитализирани се 80. На кислородна поддршка се 37, а ниту еден не е на механичка вентилација.

Во болницата во Козле се хоспитализирани 14 возрасни пациенти позитивни на КОВИД-19 и четири деца позитивни, додека тројца се суспектни на вирусот. Во ГОБ „8 Септември" се примени девет нови, а вкупно хоспитализирани се 74 пациенти. На респираторна машина се петмина. Во болницата во Битола се хоспитализирани 28, а во болницата во Штип 46 пациенти. На инфективните одделенија во Тетово, Охрид, Велес, Куманово, Прилеп, Гостивар, Струмица и Струга се хоспитализирани 123 пациенти – позитивни и сомнителни на КОВИД-19.

Вкупната бројка на КОВИД-дијагностицирани во земјава од почетокот на епидемијата изнесува 11.754, оздравени се 7.622, починале 523, а активни случаи има 3.609.

притисни ентер