Навални вчера објави дека ќе се врати во Русија во недела, на 17 јануари од Германија, каде се опоравува од обид за труење, игнорирајќи ја можноста да заврши во затвор.
Кремљ, кој што негира вмешаност во труењето, објави дека Навални е слободен да се врати во Русија кога сака, како и секој друг руски државјанин.
Навални беше пренесен во Германија во август откако се онесвести на летот од Сибир. Германија и другите западни земји тврдат дека станува збор за обид за атентат со нервен агенс новичок , но руските власти негираат каква било вмешаност во случајот.
Навални смета дека обвиненијата против него се политички мотивирани.
Вадим Кобзев, еден од адвокатите на Алексеј Навални, денеска за Ројтерс изјави дека неговиот клиент бил ставен на списокот на лица по кои се трага со национална потерница, затоа што руската затворска служба го обвинила дека не и се пријавил кон крајот на минатата година во врска со условната казна.
Навални истакнува дека во тоа време бил на лекување во Германија.
Затворската служба вели дека тој бил пуштен од болница во Берлин во септември и затоа требало да се врати во Русија и да се јави кај нив.
„Теоретски, можат да го уапсат веднаш штом се врати (во Русија), но првично само на 48 часа“, рече Кобзев.
Тој очекува дека судот ќе ги разгледа деталите за случајот на 29 јануари, кога може да нареди условната казна да се смени во затвор.
„Судот може да ја промени условната казна и да изрече затворска казна и да го стави во затвор три и пол години“, изјави Кобзев за Ројтерс.