Железничкиот сообраќај во прекин

Железничкиот сообраќај во земјава од седум часот утрово е во прекин. 

Причина за бојкотот на работата е неисплатениот надомест за материјални трошоци што машинскиот и извршниот персонал на „Железници транспорт" требал да го добие заклучно со вчера.

Како што вели претставникот на машинскиот персонал, Душко Чакаровски, утрово, пред седум часот, сообраќале само две лини, за Битола и за Гевгелија, по што сообраќајот е во целосен прекин.

Чакаровски објаснува дека бојкотот е согласно Одлуката од ноември лани која предвидува најдоцна до 25 во месецот на машинскиот и извршниот персонал да им биде во целост исплатена платата за претходниот месец, а најдоцна до 10-ти во месецот да ги добијат и материјалните трошоци.

Индонезискиот претседател нареди компензација за семејствата на 125-те жртви на стадионот

Претседателот на Индонезија, Џоко Видодо нареди компензација за семејствата на 125-те жртви во судири и стампедо на стадион за време на викендот, информираше денеска главниот министер за безбедност Махфуд МД.

– Во знак на сочувство, претседателот одлучи компензација од 50 милиони рупии или 3.200 долари за секоја жртва, појасни тој на прес-конференција.

Како што нагласи министерот, парите ќе бидат исплатени за еден или два дена.

Ковачевски: Човечкиот капитал е клучен фактор за економски развој

Човечкиот капитал е клучен фактор за економски развој и за да продолжиме да ја менуваме државата кон подобро.

Премиерот Димитар Ковачевски денеска се обрати на првиот академски час на Економски факултет – Скопје, на кој се обратија и ректорот на Универзитетот „Св. Кирил и Методиј“ во Скопје, проф. д-р Никола Јанкуловски и деканот на Економскиот факултет, проф. д-р Предраг Трпески.

Во оваа прилика премиерот Ковачевски им го честиташе на студентите и професорите првиот академски час и потсети дека пред многу години како студент и самиот присуствувал на првиот академски час на Економскиот факултет, потсетувајќи дека станува збор за образовна институција со долга историја која создава трајни вредности и го обликува општеството.

Во оваа прилика тој на идните студенти им порача дека светот, регионот и нашата држава забрзано се менуваат и дека се соочуваме со голем број на предизвици и кризи, но дека токму во вакви услови од исклучително значење е стекнувањето фундаментални и применливи знаења за домашната и светската економија.

„Ви посакувам да стекнете основни и напредни знаења и вештини за да бидете сигурни и горди со својата лична вредност, да бидете целосно конкурентни на домашниот и европскиот пазар, рамо до рамо со своите европски колешки и колеги! Ако пред повеќе децении учевме за основните економски фактори, денес општествените и економските промени ни покажуваат дека разликата помеѓу успешна и помалку успешна држава и економија е факторот на знаењето, на човечкиот капитал како критично важен фактор за економски развој! Ние сме мала држава и мала економија во развој, но тоа не смее да го сметаме како проблем, туку да го претвориме во шанса!”, истакна премиерот Ковачевски.

Премиерот едновремено порача дека сите квалитетни и високо-образовни кадри се нашиот влог во системот кој ќе ја креира и развива европска иднина на земјата, што ќе резултира и со задржување на квалитетните млади луѓе во државата.

„За тоа ја имате и ќе ја имате поддршката на Владата! И за поддршка преку стипендирање и за нови модели за ангажирање и вработување на најдобрите во македонската економија и институции! И за повисоки инвестиции во образованието и научно-истражувачкиот развој! Наш огромен успех како држава е да успееме да ги задржиме нашите луѓе, нашата вредност, нашиот народ, нашите експерти, дома за да тие директно влијаат на нашиот развој како држава!“, порача премерот Ковачевски.

Церемонијата на првиот академски час беше заокружена со свеченото доделување на индексите на стипендирани студенти, односно 10-те најдобро рангирани студенти, запишани за прв пат на Економски факултет – Скопје во учебната 2022/2023 година, според успехот од средното образование.

Факултетот за безбедност одбележа 45. години од формирањето

Факултетот за безбедност во Скопје дел од Универзитетот „Свети Климент Охридски“ – Битола денеска одбележа 45. години од формирањето и првиот академски час за оваа учебна година.

Министерот за внатрешни работи Оливер Спасовски честитајќи го јубилејот истакна дека безбедноста е наука што динамично се развива и дека треба да ги следни модерните предизвици.

-После 45 години Факултет за безбедност продолжува со несмален интензитет и стремеж да го потврдува она што со години наназад успешно го фундираше и го надградуваше своето научно-стручно реноме односно своето место во образовниот систем, рече Спасовски.

Почетокот на академската година е подеднакво важен и за новите студенти и за оние кои продолжуваат, додаде Спасовски.

Од основањето во 1977 досега на Факултетот за безбедност дипломирале 3.500 студенти прв циклус, магистрирале 140 студенти, а со звање доктор на науки од областа на безбедност се стекнале 47 студенти.

-Безбедноста со нејзината широка интердисциплинарност е наука што динамично се развива, разгранувајќи ја и етаблирајќи ја сопствената применливост во огромната низа општествени сегменти, така што модерните општества се повеќе ја препознаваат нужноста од безбедносно инволвирање, рече Спасовски.

Во годините наназад, истакна тој, Министерството за внатрешни работи демонстрираше крајно отворен и партнерски пристап кон безбедносните науки притоа на прво место ставајќи ги образовно – стручните критериуми и стандарди.

Проф. д-р Игор Неделковски, ректор на Универзитетот „Свети Климент Охридски“ Битола го честиташе јубилејот на Факултетот за безбедност во Скопје и им посака успешни студии на новите студенти.

-Искористете ги овие години за студии, за магистратура…но и за дружење. Ве повикувам да ги искористите сите потенцијали што ги нуди Факултетот, и можноста за грантови, студиски престои. Новиот менаџмент на Универзитетот ќе ве стимулира вас студентите за учество во сите процеси, рече проф. д-р Неделковски.

Новиот ректор на битолскиот Универзитет рече дека неговите заложби се за понагласено место на студентите во рамки на оваа високообразовна институција.

-Ќе направиме се што е во наша моќ Универзитетот да биде ваш втор дом, да напредувате лично и персонално, а нас да не направите горди на вашите успеси, рече проф. д-р Неделковски.

Деканот на Факултетот за безбедност проф. д-р Никола Дујовски рече дека овој факултет има историја и минато, но најмногу од се има сегашност и иднина.

Проф. д-р Дујовски истакна дека ова е единствениот Факултет за безбедност во земјата и дека во изминатите години во соработка со Министерството за внатрешни работи и другите безбедносни институции е еден од најголемите факултети во општествените науки, на што е особено горд.

-Оваа година го задржавме трендот на интерес кај матурантите и се запишаа вкупно 208 студенти, редовни и вонредни на сите активни студиски програми, посочи деканот на Факултетот за безбедност честитајќи им го првиот академски час, и посакувајќи им успешни студии како ним така и на останатите студенти.

На настанот зборуваа и повеќе професори од овој Факултет, а беа доделени и свечени плакети, меѓу другото и на министерот за внатрешни работи Оливер Спасовски

притисни ентер