Животот во време на корона за момент го промени секојдневието на 70-тина станари од домот за стари лица „Мајка Тереза“ во скопско Злокуќани. Со стравот успешно се борат, но прегратките од најблиските во моментов најмногу им недостасуваат.
Но и покрај ова, секој на свој начин и пркоси на монотоноста. Не поминува ден кај чичко Милан без весници. Наутро чита колумни, а попладне решава крстозборки. Вредните раце на Стојанка кројат заштитни маски за сите станари, а дел ги донира на оние на кои им е најпотребно. За неа не постои поубаво хоби во денот. А тетка Вера веќе 15-та година го разубавува дворот на домот со зеленило. Вљубена е во љубичиците.
„Појадуваме од 8 и пол до 9. Си земаме појадок и после си излегувам, наместо фискултура во соба – јас со копањето си вежбам. Имам 80 години ама не се предавам. Ништо не ме боли.“вели Вера Цветановска .
Дваесетина вработени се грижат за редот и мирот во домот. Се внимава на доставата на храна и лекови. Редовно се дезинфицираат површините и се води сметка да не седат повеќе станари во иста просторија. Дури и се организираат и едукативни предавања за водењето лична хигиена, вели раководителот на домот Дејан Петров.
.„Преку апликацијата Вибер се слушаат со своите најблиски. Лекарствата ги обезбедуваме ние. Нивната социјална дистанца сега е поголема, за жал немаме интеграција меѓутоа тие поединечно си творат и си работат. Направивме неколку парцијални, таканаречени социјално-едукативни клубови каде што на нашите корисници обавезно им е потенцирано миењето на раце и водењето на личната хигиена, изјави Дејан Петров, раководител на дом за стари лица „Мајка Тереза“ .
На станарите им е достапен и психолог два пати неделно. Петров вели дека изолацијата се одвива без проблеми, а физичкото и менталното здравје на корисниците и натаму останува приоритет број еден.
„Ги слушаат препораките, без разлика на нивната возраст, доба и местото од кое доаѓаат. Се уште нема паника меѓу нив. Се придружуваат комплетно до препораките и сега за сега, фала му на Бога, се е добро.“ изјави Дејан Петров, раководител на дом за стари лица „Мајка Тереза“.
По неочекуваниот снег и студеното време минатата недела, денешните сончеви зраци конечни ги изнесе станарите надвор од своите скромни живеалишта. Многумина од нив низ блага насмевка рекоа – преживеавме многу лоши работи, ќе помине и оваа.
„Секојдневието за овие лица мора да продолжи, дури и во вакви отежнати услови. Одовде бевме испратени со многу насмевки и апел – да си го чуваме здравјето, да се сакаме и да бидеме одговорни кон себе и своите најблиски.“