„КАМ“ ги отвори вратите на најголемиот логистички центар во државата

На вкупна површина од 60.000м2, КАМ го претстави најголемиот логистички центар досега во Македонија, изграден по најсовремени стандарди. 

Објектот се наоѓа на само неколку километри од центарoт на Скопје, а се протега на простор од 16.000м2 и располага со капацитет од 6.800 палети за суви продукти, како и 2.500 палети за замрзнати производи, овошје, зеленчук и свежо месо.

Оваа инвестиција вредна 12.000.000 евра овозможува брзина и ефикасност во работењето кои, придонесуваат за огромна заштеда во цената на производите која се пренесува на крајните потрошувачи.

Логистичкиот центар поседува сопствен оддел за Контрола на квалитетот кој врши дневни редовни контроли на артиклите на самиот влез со што гарантира свежина и квалитет на сите производи.

Процесот на прием и чување на производите на посебни температурни режими, во соодветни комори како на пр. овошјето, зеленчукот, месото, чоколадите, млечните и длабоко замрзнатите производи подлежи на строги контроли.

За КАМ, свежината, безбедноста и квалитетот на сите производи има врвен приоритет!

Редовното снабдување на сите КАМ маркети ширум земјата на дневно ниво КАМ го реализира и контролира самостојно. Современата опрема и модерните електро-виљушкари кои се користат, не само што овозможуваат максимална ефикасност, туку со нив значително се минимизира и физичката работа во целиот објект. Логистичкиот центар нуди современи услови за работа, адекватен надомест и пријатна атмосфера за повеќе од 150 вработени.

Со начинот на работа, логистичкиот центар КАМ активно придонесува за заштита на животната средина. Месечно тука се рециклираат 100 тони отпад, а целосно оптимизираниот процес на дистрибуција заштедува 5 милиони километри пат месечно, што директно заштедува и 900 тони емисија на CO2 во атмосферата.

Со својот нов логистички центар, КАМ ги донесе европските стандарди на работење во малопродажбата на прехранбени производи во Македонија, па оттаму и мотото „Висок квалитет – ниски цени“ не е обична флоскула, туку реалност која се практикува во КАМ.

Во Велика Британија најголемиот еднодневен штрајк во последната деценија

Во Велика Британија денеска е во тек најголемиот штрајк во последната деценија, а околу половина милион луѓе штрајкуваат поради платите, работните места и условите за работа.

Во штрајкот се вклучени членови на седум синдикат, а од протестот се погодени училиштата, универзитетите, возовите и автобусите.

Илјадници училишта денеска се затворени поради штрајк на Националниот синдикат за образование (НЕУ). Државните службеници, машиновозачите и автобусите и универзитетскиот персонал исто така ја прекинаа работата во најголемиот еднодневен штрајк во последната деценија.

Штрајкувачите се собраа пред железничките станици, училиштата, владините министерства и универзитетите низ целата земја, а синдикатите велат дека добиваат силна поддршка од јавноста.

Штрајкуваат повеќе од 100.000 членови на синдикатот за јавни и комерцијални услуги (ПЦС), вклучувајќи го и персоналот на граничните служби на пристаништата и аеродромите.

Во меѓувреме, Конгресот на синдикатите (ТУЦ) е фрустриран од контроверзните планови на владата за нов закон за минимално ниво на услуги за време на штрајкови.

Петицијата против законот, потпишана од повеќе од 200.000 граѓани, ќе биде доставена до кабинетот на премиерот.

Генералниот секретар на ТУЦ, Пол Новак, изрази надеж дека денешните протести и штрајкови ќе испратат силна порака до владата за зголеменото незадоволство меѓу работниците.

Групи кои ги претставуваат родителите објавија заедничка изјава за поддршка на наставниците кои штрајкуваат. /МИА

Лајка: 85 успешни стерилизации и кастрации за само 20 дена во јануари

Со појавата на првиот случај на „distemper“ во прифатилиштето на ЈП Лајка крајот на минатата година, беа воведени и спроведени низа превентивни мерки.

Прифатилиштето беше 30 дена под целосен карантин и фокусот беше на третман на заболените кучиња со што ситуацијата во моментот е под контрола. По истекот на карантинскиот период, продолживме со редовните работни активности, вклучително спроведувањето на ветеринарни интервенции односно стерилизација и кастрација. Во период од 11.01 до 31.01.2023 се направени рекордни 85 стерилизации и кастрации.

Удел во успешното справување со овој проблем имаат и граѓаните кои во огромен број се одзваа на нашиот повик лично да донесат бездомно куче на хуман третман во прифатилиштето и за тоа сме им неизмерно благодарни.

Отворениот повик за било кој граѓанин да донесе бездомно куче на третман сè уште е во тек и ке биде се дур има ваков огромен интерес од истото.

Ги повикуваме сите граѓани да го донесат својот маалски миленик на третман, со цел уште многу успешни месеци во решавање на проблемот со бездомната популација на кучиња.

Русија повторно ја зголемува испораката на гас преку Украина

Русија повторно испорачува повеќе природен гас низ Украина кон Европа по неодамнешните намалувања, соопшти денеска државната енергетска компанија Газпром.

- Газпром испорачува руски гас по транзит низ територијата на Украина во обем што го потврди украинската страна на гасната компресорска станица Суџа: 29,4 милиони кубни метри на 1 февруари, изјави портпаролот Сергеј Купријанов во Москва, пренесе ДПА.

Гаспром вчера испумпа 24,2 милиони кубни метри – околу 20 проценти помалку – преку Украина користејќи го објектот Суџа лоциран во јужниот дел на рускиот регион Курск.

Зголемувањето најверојатно се должи на фактот што цената на гасоводниот гас повторно стана поатрактивна за трговците на големо. Во јануари цените на самото место каде што се тргуваат краткорочни договори за снабдување со гас паднаа поради релативно топлото време. Но, со почетокот на февруари поевтинија и договорите за гасоводен гас, кој вообичаено се тргува еден месец однапред.

И покрај зголемувањето, Русија сè уште испорачува значително помалку гас во Европа отколку пред почетокот на војната во Украина пред речиси една година. Москва ја прекина испораката преку гасоводот Северен тек 1 Балтичко Море во септември поради наводни технички проблеми. Набргу потоа, подводна експлозија целосно ги стави вон употреба гасоводните цевки.

притисни ентер