Како што пренесе Танјуг, на прес-конференција во Белград Стефановски направи одлична атмосфера, свирејќи неколку песни од албумот. Рече  дека албумот е разнороден, но дека неговиот авторски ракопис може да се препознае во секоја од песните.

- Албумот е осмислен и работен за да трае, истакна Стефановски и додаде дека „Сеир“ не е модерно продуциран, туку се е изведено во живо. Бил создаван 10 години, а четири години траело снимањето.

Целта  на новиот албум, рече Стефановски, е потсетување за луѓето малку да подзапрат. - Денеска сите се премногу амбициозни, сите итаат и брзаат, пребрзо возат, тежнеат кон некакви успеси, а забораваат на она што е навистина важно и на вредностите што го прават животот, а тоа се семејството, пријателите..., рече Стефановски.

Според него, претходниот албум, „Кула од карти“, бил повеќе психоаналитички што, како што рече, луѓето не сакаат многу, туку им е подрага забавата, а „Сеир“ е токму таков.

Потсети дека повеќе не свири со групата „Леб и сол“ и дека е се поинаку откако членовите се разделија и работат сами, зашто на овој начин критиката е упатена директно кон еден човек, но и сите пофалби.

- Ако се случи гаф, секогаш можеш да се скриеш зад басистот, а кога си сам, тоа е невозможно, рече познатиот музичар. Додаде дека не му е проблем ако прочита критика, бидејќи веќе му се има случено некои албуми да поминат полошо, а некои подобро.

Стефановски, како што пренесе Танјуг, е задоволен од реакциите на публиката во Македонија и во Хрватска, каде албумот е веќе претставен, и се надева на добар прием кај српската публика.

Објасни дека изразот „сеир“ е балканска дисциплина на пасивно гледање на животот, но не во негативен контекст. Како пример наведе група граѓани кои седат пред продавница во неговото соседство секој ден со години и кои, како што рече, го имаат тој пасивен, но интересен однос кон светот околу себе.

- Се на албумот е едноставно и јасно, заклучи Стефановски, кој планира концерт во Белград, но се уште не знае кога. /Извор: МИА/

Датум на објава: вторник, 13 мај 2014 во 19:38
www.kanal5.com.mk

коментари

остави коментар